SOGAMA
SOGAMA
SOGAMA
SOGAMA
SOGAMA
SOGAMA
SOGAMA en Facebook
SOGAMA en Twitter
SOGAMA en Vimeo
SOGAMA en Linkedin
SOGAMA

Idiomas

Sogama subministra 50 novos composteiros domésticos no concello de Pazos de Borbén

Print this pagePrint this page
  • Os recipientes, con capacidade para 350 litros, están fabricados con materiais reciclados e reciclables.
  • Entregaranse por parte do ente local en vivendas unifamiliares que dispoñan de terreo (horta ou xardín) no que aplicar o compost resultante.
  • Con esta nova partida, serán 95 os fogares deste municipio que xa practican a autocompostaxe.
  • O control de parámetros tales como a humidade, a temperatura e o osíxeno por parte dos usuarios propiciará a obtención dun abono de calidade.
  • A compostaxe doméstica constitúe un proceso que se axusta plenamente ao concepto de economía circular e que trae consigo importantes beneficios ambientais, económicos e sociais.

Cerceda, a 7 de novembro de 2018.- A solicitude do propio concello de Pazos de Borbén, interesado en estender as prácticas de autocompostaxe entre a súa veciñanza, a Sociedade Galega do Medio Ambiente subministrou nesta localidade pontevedresa 50 novos composteiros, de 350 litros de capacidade  e fabricados con materiais reciclados e reciclables, a fin de que estes sexan entregados noutras tantas vivendas unifamiliares que dispoñan de terreo (horta ou xardín) no que aplicar o compost resultante.

Contabilizando a nova partida, xa son 95 os fogares de Pazos de Borbén que participan activamente no programa de compostaxe doméstica impulsado por Sogama, e ao que anos atrás se adscribiu  o ente local coa pretensión de alcanzar importantes beneficios ambientais e sociais.

Ao pechar o círculo de reciclaxe da materia orgánica en orixe, propíciase que os cidadáns depositen menor cantidade de residuos nos contedores verdes convencionais, circunstancia que podería diminuír a frecuencia de recollida e transporte e, polo tanto, as emisións de CO2 á atmosfera. Ademais, este sistema permítelles elaborar o seu propio compost, polo xeral de moi boa calidade, evitando a compra de abonos.

DINÁMICA

A operativa comeza coa colocación do composteiro nun lugar axeitado, próximo á vivenda (por comodidade), en contacto directo coa terra, para facilitar a entrada dos organismos des compoñedores, e nunha zona sombreada e protexida de cambios bruscos de temperatura e de humidade.

Resulta conveniente que os restos orgánicos a depositar neste recipiente estean o máis desmenuzados posible para favorecer a súa descomposición. Así mesmo, faise indispensable levar a cabo un control sobre tres parámetros básicos a fin de que o resultado final sexa o desexable: a temperatura, sendo óptima ao redor de 50-60ºC; a humidade, xa que a mestura debe estar húmida, pero non mollada, circunstancia que provocaría a súa putrefacción; e o osíxeno, toda vez que se trata dun proceso aerobio, requirindo que a mestura se remova periodicamente.

O compost favorece a saúde do solo, pois, ao ser un produto natural, libre de compostos químicos e patóxenos, actúa como bactericida e funxicida, reforzando ao mesmo tempo a resistencia das plantas fronte a pragas e enfermidades.

O proceso axústase perfectamente ao concepto de economía circular ao poñer en valor un residuo (a materia orgánica xerada nos fogares) mediante a súa transformación en recurso.

MAIOR SUSTENTABILIDADE

A día de hoxe, xa son 283 entidades de toda Galicia (184 concellos, 84 centros educativos e 15 colectivos sociais) as que se atopan adscritas ao programa de compostaxe doméstica de Sogama, tendo repartido entre as mesmas máis de 9.500 composteiros.

A iniciativa, con excelentes resultados, tanto respecto á súa acollida por parte dos cidadáns como á calidade do compost obtido, prosegue o seu camiño co fin de lograr unha maior sustentabilidade na xestión dos residuos urbanos.

Toda a información sobre este programa en www.compostaconsogama.gal.  

Saúdos, Departamento de Comunicación

7 Nov 2018

Galería