Reduce Residuos: Aforra Recursos

Reduce Residuos: Aforra Recursos. É o noso Reto, é a nosa Responsabilidade
Con pequenos xestos diarios, podemos contribuír, entre todos, a minimizar a xeración de residuos urbanos. Con isto lograremos, non só importantes beneficios ambientais, senón tamén económicos e sociais. A seguir, detallamos uns sinxelos consellos cos que reducir a produción de residuos, tanto na compra, apostando por un consumo responsable, como na oficina e centros educativos, así como no propio fogar.
[1]	Á hora de elixir un produto, ten en conta a súa calidade e durabilidade, así como os residuos que xeran as diferentes opcións de comercialización do mesmo.
[2]	Compra os alimentos tendo en conta a súa caducidade. Planifica o teu consumo.
Reduce Residuos: Aforra Recursos. É o noso Reto, é a nosa Responsabilidade [pdf] [3]

Na compra, non compres residuos
[4]	Intenta adquirir artigos que estean minimamente envoltos. Á hora de escoller entre produtos semellantes, elixe o que teña menos envases e embalaxes.
[5]	Non esquezas levar o teu carro da compra ou a bolsa de lona ou tela de toda a vida, evitando así utilizar unha nova bolsa de plástico cada vez. Rexeita as bolsas que non necesites, aínda que insistan en regalarchas.
[6]	Solicítalle ao dependente/a que non envolva e empaquete os produtos que compraras, a non ser que sexa imprescindible.
[7]	Procura comprar artigos que poidan volver utilizarse. Lembra que os de usar e tirar incrementan a cantidade de residuos.
[8]	Promove o uso de produtos que veñan en recipientes que poidan volver a encherse.
[9]	Rexeita os consumibles (froitas, carnes, verduras) envasados en bandexas de plástico.
[10]	Ten por costume adquirir artigos por xunto, sen empaquetar. Pensa que o envoltorio non forma parte do produto que adquirimos e que acaba por converterse nun residuo do que nos desprendemos inmediatamente.
[11]	Nas bebidas e líquidos, opta por envases grandes, e se son retornables, mellor. As botellas, frascos e tarros de vidro son unha magnífica opción (o vidro é 100% reciclable).
[12]	Lembra que comprar en grandes cantidades non só é máis barato, senón que tamén permite reducir a cantidade de embalaxes. Ten en conta que os produtos en tarro familiar xeran menos residuos por unidade.
[13]	Antes de realizar a compra, fai a lista do que necesites. Deféndete ante as estratexias de venda das grandes superficies (ofertas tentadoras, compras impulsivas, etc).

Na oficina e centros educativos
[14]	Non desaproveites o papel. Usa sempre as dúas caras das follas e reutiliza as impresas por un lado para borradores, tarefas, comunicación informal, etc.
[15]	Dalle preferencia aos materiais con recambio. É un xeito eficaz de reducir, máis ecolóxico e económico que a utilización de materiais dun único uso.
[16]	Os papeis de imposible ou difícil reciclaxe (plastificados, encerados,...) só deberías empregalos cando non exista outra posibilidade menos impactante.
[17]	Usa papel reciclado sempre que poidas. Isto aumentará a súa demanda contribuíndo á súa maior produción e, en consecuencia, á preservación de recursos naturais.
[18]	Utiliza o teu propio vaso ou taza e evita o uso de produtos de usar e tirar.

No fogar
[19]	Usa trapos de cociña en troques de rolos de papel, e utiliza panos de algodón en troques de panos de papel.
[20]	Cos restos das comidas e un pouco de imaxinación, podemos preparar atractivos menús, evitando que acaben no cubo do lixo.
[21]	Adquire pilas recargables en lugar das convencionais.
[22]	Respecto das cosas que xa non usen os membros da unidade familiar, debemos procurar que alguén as reciba. Lembra que con moi pouco podes facer máis fácil a vida doutros.