- Aumenta en máis de 6 puntos respecto a 2024 e supera o obxectivo do 50% establecido no Real Decreto de envases
Cerceda, 9 de xullo de 2026.-España reciclou en 2025 un total de 86.998 toneladas de envases domésticos de aluminio, o que representa unha taxa do 57% sobre as 153.880 toneladas adheridas a Ecoembes. Esta cifra supón un avance significativo respecto a 2024, cando a taxa de reciclaxe foi do 50,7%, e confirma a evolución positiva da reciclaxe deste material no noso país.
Os datos do pasado ano sitúan ao aluminio por riba do obxectivo do 50% establecido no Real Decreto de envases e residuos de envases para este material, e reflicten o esforzo conxunto de cidadáns, administracións, sistemas colectivos de responsabilidade ampliada do produtor (SCRAP), plantas de selección, recuperadores e recicladores.
Tal e como sinalou Olga Roger, directora xeral de Arpal (Asociación para a Reciclaxe de Aluminio), “O dato de 2025 é especialmente relevante porque demostra que a reciclaxe de envases de aluminio segue a avanzar e que a cidadanía está cada vez máis concienciada. O aluminio é un material permanente, reciclable indefinidamente e cun gran valor dentro do circuíto de recuperación”.
Ademais dos envases domésticos, os datos dispoñibles para 2025 recollen tamén información sobre os comerciais e industriais. No ámbito comercial adherido a Ecoembes, declaráronse 1.978 toneladas de envases de aluminio, das que 106 toneladas foron recicladas por vía privada. Por outra banda, os datos achegados polo SCRAP Implica reflicten 721 toneladas de envases industriais de aluminio adheridas e 108 toneladas de envases comerciais.
Desde Arpal lémbrase que todos os envases domésticos de aluminio deben depositarse no contedor amarelo, tanto os ríxidos coma os semirríxidos e flexibles: latas de bebidas, bandexas, aerosois, tapas, envoltorios, cápsulas ou papel de aluminio usado como envase. A entidade reforzou nos últimos anos as súas campañas para axudar á cidadanía a identificar correctamente estes envases e evitar que queden fóra do circuíto de reciclaxe.
Cabe destacar que a reciclaxe de aluminio permite aforrar ata un 95% da enerxía necesaria para producir aluminio primario, e que o material pode reciclarse indefinidamente sen perder as súas propiedades.
Fonte: ARPAL
