• BusinessEurope presenta as súas recomendacións á CE e reclama máis harmonización, demanda de materiais reciclados e control regulatorio

Cerceda, 15 de maio de 2026.- A industria europea trasladou á Comisión Europea as súas principais prioridades para o desenvolvemento da futura Circular Economy Act, unha lexislación chamada a acelerar a transición cara a modelos produtivos máis circulares e reforzar a competitividade industrial do continente.

As recomendacións foron presentadas por BusinessEurope durante un encontro celebrado coa comisaria europea de Medio Ambiente e Resiliencia Hídrica, Jessika Roswall, e o director xeneral da organización empresarial, Markus J. Beyrer.

A patronal empresarial europea subliña que a economía circular xa non responde unicamente a obxectivos ambientais, senón tamén a necesidades estratéxicas relacionadas coa competitividade, a resiliencia industrial e a seguridade da subministración de materias primas.

Neste contexto, Markus J. Beyrer destacou que, nun escenario marcado pola inestabilidade xeopolítica e as tensións nas cadeas de subministración, “reter recursos de alto valor dentro da economía europea está a converterse nunha necesidade esencial”.

Segundo BusinessEurope, a futura Circular Economy Act pode converterse nun elemento decisivo para escalar modelos de negocio circulares en Europa.

Prioridades

O documento presentado pola industria europea identifica tres grandes prioridades para garantir a eficacia da futura lexislación comunitaria.

A primeira pasa por avanzar cara a un mercado único realmente harmonizado, eliminando barreiras regulatorias e fragmentacións que actualmente dificultan o movemento transfronteirizo de materiais e recursos secundarios dentro da Unión Europea.

A segunda prioridade céntrase en reforzar a demanda de materias primas secundarias, creando condicións económicas que permitan consolidar modelos circulares viables e escalables.  E, a terceira, reforzar os mecanismos de aplicación e control normativo para garantir condicións de competencia equitativas entre empresas.

As propostas recollidas no documento son resultado dunha serie de talleres organizados a finais de 2025 con participación de expertos industriais, federacións empresariais, representantes da Comisión Europea e Estados membro.

O obxectivo destes encontros foi identificar barreiras regulatorias, carencias do marco actual e oportunidades de mellora para acelerar a implantación de modelos de economía circular en Europa.

BusinessEurope sinalou que continuará a participar no diálogo coas institucións europeas durante o proceso de elaboración da futura Circular Economy Act.

Fuente e imaxe: BusinessEurope