• Participou nunha mesa redonda conducida polo ex director de Moda-re, Albert Alberich, e enmarcada no V Encontro ESGREM, na que deixou constancia do plan de acción deseñado ao respecto polo Goberno galego e que ten o seu máximo expoñente na que será a primeira planta pública de clasificación de téxtiles de España

• Cunha capacidade inicial para 3.000 Tn/ano, ampliable a 24.000 Tn, a instalación, que se atopa en obras, xerará, nunha primeira fase, entre 16 e 30 empregos directos que se cubrirán, con carácter preferente, por persoas con discapacidade e/ou en risco de exclusión social

• O presidente de Sogama incidiu en que a función desta empresa pública será a de complementar o traballo das entidades de economía social, nunca substituílo

Almería, 28 de abril de 2026.- No marco do V Encontro ESGREM (Entes Supramunicipais para a Xestión de Residuos Municipais), celebrado en Albox (Almería), o presidente de Sogama, Javier Domínguez, participou onte nunha mesa redonda centrada no impulso á reciclaxe do residuo téxtil.

Conducida por Albert Alberich, experto e ex director de Moda-re, a tertulia contou tamén coas intervencións de Ángel Álvarez, xefe de Recollida de Residuos Urbanos da Comarca de Pamplona, e Ángel Rodríguez, xerente do Consorci de Ribera i Valldigna.

Durante a súa exposición, Domínguez Lino lembrou que a moda rápida de usar e tirar está a xerar un problema ambiental de gran magnitude, coa particularidade de que unha alta porcentaxe de residuo téxtil séguese a depositar na fracción resto. É por isto que, desde o seu punto de vista, urxe avanzar cara a un modelo de produción e negocio máis sostible e respectuoso coa contorna.

Tendo en conta as esixencias da lei 7/2022, do 8 de abril de residuos e chans contaminados para unha economía circular, tanto en relación á recollida diferenciada do téxtil como á obrigación que deben asumir os produtores de incorporar aos seus artigos unha porcentaxe de fibra reciclada, a Xunta de Galicia, a través de Sogama, e nunha firme aposta pola moda circular, decidiu poñer en marcha, no propio Complexo Medioambiental de Cerceda (provincia da Coruña), a que será a primeira planta pública de clasificación de residuos téxtiles de España, á que se destinará un investimento de 22,4 M€.

Durante a súa alocución, Javier Domínguez eloxiou o papel desempeñado por entidades sen ánimo de lucro na xestión de residuo téxtil e fixo especial referencia aos famosos roupeiros de Cáritas que antes existían nos municipios galegos e ao seu magnífico labor social a través da recollida de roupa e acondicionamento da mesma para entregarlla a persoas e familias sen recursos. Un xesto altruísta e solidario que, ademais, evitaba, ou alomenos mitigaba, un problema ambiental.

Neste sentido, e en relación á implantación da recollida selectiva do téxtil nos concellos, obrigatoria a partir do 1 de xaneiro de 2025,  recomendou que, para maiores garantías, fágase atendendo ás particularidades de cada territorio.

Planta pioneira

Cunha capacidade inicial para 3.000 Tn/ano, ampliable a 24.000 Tn, a planta de clasificación de téxtiles de Sogama xerará, nunha primeira fase, entre 16 e 30 empregos directos que se cubrirán, con carácter preferente, por persoas con discapacidade e/ou en risco de exclusión social.

Os residuos téxtiles serán sometidos, en primeira instancia, a un proceso de preclasificación, onde se separarán as pezas que estean en boas condicións para un segundo uso. A parte restante separarase de forma automática, cun sistema apoiado por intelixencia artificial, retirando a continuación elementos accesorios talles como botóns, cremalleiras, etc.

O material resultante prénsase e envíase aos centros recicladores para transformarse en fibra téxtil reciclada ou ben, no caso de non cumprir os requisitos de calidade, en produtos illantes.

A parte que non poida ser reutilizada nin reciclada, valorizarase enerxeticamente para producir electricidade, evitando desta forma que acabe enterrada en vertedoiro.

Saúdos, Departamento de Comunicación