• A Axencia Europea de Medio Ambiente subliña a necesidade de mellorar o marco regulatorio, facilitar o acceso a financiamento e promover a innovación tecnolóxica, así como impulsar cambios no comportamento dos consumidores

• Igualmente, pon o foco no impacto social da economía circular, destacando a importancia de garantir que os empregos xerados sexan xustos, inclusivos e de calidade

Cerceda, 18 de maio de 2026.- As empresas e emprendedores de economía circular en Europa seguen atopando importantes dificultades para escalar os seus modelos de negocio, malia o seu potencial para reducir presións ambientais e climáticas. Así o indican dous informes publicados pola Axencia Europea de Medio Ambiente (AEMA), que analizan tanto os obstáculos ao crecemento como a necesidade de garantir unha transición xusta no emprego.

O contexto é especialmente relevante se se ten en conta que o mercado da remanufactura en Europa podería xerar ata 500.000 novos empregos de aquí a 2030, segundo o Clean Industrial Deal da UE, o que sitúa á economía circular como un vector clave de transformación económica.

Estas análises enmárcanse no desenvolvemento do futuro Circular Economy Act da Comisión Europea e apuntan á necesidade de reforzar as condicións para que estes modelos poidan consolidarse e ampliarse no mercado. De feito, a futura normativa busca avanzar cara a un mercado único de materias primas secundarias, aumentar a dispoñibilidade de materiais reciclados de alta calidade e estimular a súa demanda, contribuíndo a reforzar a resiliencia, a competitividade e a descarbonización do sistema produtivo europeo.

A AEMA identifica que a expansión dos modelos circulares continúa a ser limitada en Europa. Escalar estes modelos implica, non só crecer en tamaño, senón tamén ampliar o seu alcance no mercado e xerar cambios estruturais e culturais. Neste sentido, a Axencia subliña a necesidade de mellorar o marco regulatorio, facilitar o acceso a financiamento e promover a innovación tecnolóxica, así como impulsar cambios no comportamento dos consumidores.

Dimensión social

Respecto do impacto social da economía circular, a AEMA destaca a importancia de garantir que os empregos xerados sexan xustos, inclusivos e de calidade.

Entre 2014 e 2023, o número de empregos vinculados á economía circular na UE-27 creceu un 10%, ata alcanzar os 4,4 millóns de postos de traballo.

Os informes da AEMA conclúen que a eficacia das políticas de economía circular depende en gran medida da súa capacidade para integrar criterios de equidade, inclusión e participación desde o seu deseño.

Estes elementos non só contribúen a mellorar os resultados sociais, senón que tamén reforzan a cohesión, a resiliencia económica e a confianza pública, factores clave para o éxito da transición cara a modelos máis sostibles.

Neste contexto, a AEMA subliña que a economía circular non só é unha ferramenta ambiental, senón tamén un instrumento para impulsar cambios estruturais no modelo produtivo europeo.

Fonte: AEMA