• Diminuír o uso do coche particular, mellorar a eficiencia do fogar, evitar o desperdicio de alimentos, alongar a vida útil dos produtos e optar por materiais reciclados, constitúen comportamentos que poden resultar altamente beneficiosos para o medio ambiente

Cerceda, 22 de maio de 2026.- Máis dunha década despois da firma do Acordo de París, o mundo segue emitindo gases de efecto invernadoiro a un ritmo frenético, pero os expertos sinalan que aínda estamos a tempo de frear as emisións de gases de efecto invernadoiro e evitar os peores impactos do cambio climático. O PNUMA (Programa das Nacións Unidas para o Medio Ambiente) comparte unha serie de consellos:

1. Camiña, pedalea ou usa o transporte público

O transporte é unha das maiores fontes de emisións de gases de efecto invernadoiro, e unha parte considerable provén do uso do automóbil. É por iso que, para viaxes curtas, recoméndase camiñar ou desprazarse en bicicleta e, para viaxes máis longas, o transporte público ou compartir vehículo. Prescindir do automóbil pode aforrar ata dúas toneladas de emisións de dióxido de carbono ao ano.

2. Sé consciente do teu consumo de enerxía

Usar menos electricidade —que aínda provén en gran medida da queima de combustibles fósis— é unha das formas máis rápidas e económicas de reducir emisións.

Os dispositivos electrónicos poden consumir moita enerxía, polo que debe limitarse o uso innecesario de datos e optar por tecnoloxía eficiente, sempre que sexa posible. Dado que a produción destes dispositivos tamén require dun consumo intensivo de enerxía, o recomendable é utilizalos por máis tempo e reparalos cando se danen, en lugar de refugalos.

3. Mellora a eficiencia do teu fogar

Os sistemas de calefacción e refrixeración son grandes consumidores de enerxía, polo que convén axustar o termostato. Se as altas temperaturas son un problema, investir no que se coñece como refrixeración pasiva constitúe a mellor opción: teitos reflectores, ventilación cruzada e sombra natural poden reducir a temperatura interior ata en 8 °C. Tamén o é mellorar o illamento da vivenda ou cambiar a unha bomba de calor. Con isto poderíase reducir a pegada de carbono nuns 900 quilogramos ao ano e diminuír ao mesmo tempo os custos enerxéticos.

4. Axusta a túa alimentación

Os alimentos de orixe vexetal —como froitas, verduras, legumes, cereais integrais, chícharos, noces e lentellas— adoitan ter un menor impacto climático e requiren menos terra e auga.

5. Non desperdicies alimentos

Os fogares de todo o mundo desperdician máis de mil millóns de comidas cada día. Refugar alimentos equivale a desperdiciar a enerxía, a terra e os fertilizantes utilizados para producilos. De aí a importancia de planificar os menús, comprar só o necesario, almacenar os alimentos de forma axeitada e aproveitar as sobras. A compostaxe representa unha excelente alternativa para a parte non comestible, podendo minorar de xeito significativo a liberación de metano e dióxido de carbono, dous gases frecuentes de efecto invernadoiro xerados polos residuos orgánicos.

6. Protexe os bosques que te rodean

Son esenciais, xa que almacenan  cantidades masivas de carbono que, de liberarse á atmosfera, poderían agravar severamente a crise climática. Podes protexer estes ecosistemas elixindo produtos de madeira e papel sostibles e apoiando iniciativas de restauración forestal.

7. Compra menos cousas e úsaas por máis tempo

Todo o que compramos ten un custo en carbono. Necesítase enerxía —a miúdo de orixe fósil— para extraer materias primas, fabricar produtos e transportalos polo mundo. Unha das formas máis eficaces de reducir emisións é consumir menos. Repara o que poidas, reutiliza o que teñas e recicla o demais.

8. Usa a túa voz

As persoas tamén inflúen a través dos produtos que compran, as empresas que apoian e o liderado que elixen. Aínda que, por si soas, non poden resolver a crise climática, as súas decisións poden reducir emisións, influír nos mercados e xerar apoio para accións máis amplas.

Fonte: PNUMA