SOGAMA en Facebook
SOGAMA en Instagram
SOGAMA en Twitter
SOGAMA en Vimeo
SOGAMA en Linkedin
SOGAMA

Idiomas

Os escolares do IES Eduardo Pondal de Ponteceso implícanse na autocompostaxe

Print this pagePrint this pagePrint this page
  • Foron instruídos esta mañá por técnicos de Sogama a fin de que coñecesen de forma pormenorizada o proceso de fermentación da materia orgánica, así como o control e seguimento que deben realizar sobre o mesmo para obter un compost de alta calidade.
  • Os educadores incidiron na responsabilidade cidadá a través do principio dos 3R, á vez que explicaron a actividade de Sogama.
  • Voltarán a este centro o próximo 13 de decembro para formar ao alumnado de 2º de ESO.

Cerceda, a 23 de novembro de 2021.-  Escolares de 1º de ESO do IES Eduardo Pondal de Ponteceso (A Coruña) foron instruídos esta mañá por técnicos de Sogama na  autocompostaxe a fin de que coñecesen de forma pormenorizada o proceso de fermentación da materia orgánica, así como o control e seguimento que deben realizar sobre o mesmo o obxectivo de obter un compost de alta calidade que cumpra con todos os requisitos esixidos na normativa vixente para ser aplicado con garantías na agricultura e xardinería.

Así mesmo, explicaron aos estudantes a necesidade de adoptar determinados xestos ambientais para contribuír á reciclaxe e, polo tanto, á posta en valor dos residuos mediante a súa conversión en novos produtos, propiciando desta forma un importante aforro de enerxía e materias primas virxes.

OS 3R, CLAVES NA SUSTENTABILIDADE

Os monitores incidiron tamén no principio europeo dos tres erres (Reducir, Reutilizar e Reciclar) como unha das principais claves para transitar desde unha economía lineal, caracterizada polas malas prácticas de usar e tirar, a unha lineal na que os residuos son convertidos en recursos. De aí a importancia de que os cidadáns actúen de forma responsable no consumo, adquirindo unicamente o necesario, que alonguen ao máximo a vida útil dos artigos e, unha vez convertidos en refugallos, que os separen en orixe por tipoloxías e os depositen nos correspondentes contedores habilitados nas vías públicas: amarelo, para envases de plástico, latas e briks; azul, para o papel e cartón;  iglú verde, para envases de vidro; e verde xenérico, para a fracción resto.

O destino dos residuos especiais ou perigosos debe ser o punto limpo municipal para que sexan entregados a xestores autorizados co fin de que reciban o tratamento axeitado.

No Complexo Medioambiental de Cerceda, unha vez separados os materiais susceptibles de ser reciclados, a parte restante convértese en enerxía eléctrica, evitando desta forma o seu vertido, a peor das opcións debido ao seu negativo impacto sobre o medio ambiente e a saúde.

Como colofón da sesión formativa, os mozos puideron participar na montaxe dun composteiro subministrado por Sogama e cuxo compost utilizarán na horta do recinto escolar.

O Concello de Ponteceso está adscrito ao programa de compostaxe doméstica de Sogama cun total de 130 vivendas unifamiliares.

Os educadores volverán a este centro o próximo 13 de decembro. Nesta ocasión, a sesión estará dirixida ao alumnado de 2º de ESO.

Saúdos, Departamento de Comunicación

23 Nov 2021

Galería