• O Regulamento de Vehículos ao final da súa Vida Útil reforza a economía circular na automoción con novos obxectivos de contido reciclado, maiores esixencias de reciclaxe e medidas para recuperar materias primas críticas
• A CE considera que o novo marco normativo representa un paso decisivo para consolidar unha industria automobilística máis sostible, resiliente e menos dependente de materias primas virxes

Cerceda, 1 de outubro de 2026.- A Unión Europea estrea un novo marco normativo para reforzar a economía circular no sector da automoción. O Regulamento de Vehículos ao fin da súa Vida Útil entra en vigor co obxectivo de mellorar o deseño, a produción, a recollida e o tratamento dos mesmos, impulsando a reciclaxe de materiais e reducindo a dependencia europea de materias primas importadas.

A nova regulación busca aumentar a recuperación e reutilización de materiais de alto valor, mellorar a eficiencia no uso dos recursos e fortalecer a competitividade industrial europea mediante un maior aproveitamento das materias primas secundarias.

Novidades

Unha das principais novidades do regulamento é a introdución de obxectivos obrigatorios de contido reciclado na fabricación de vehículos. A partir de 2032, os vehículos novos deberán incorporar un 15% de plástico reciclado, porcentaxe que aumentará ata o 25% en 2036. Ademais, a Comisión Europea establecerá obxectivos específicos para o uso de aceiro e aluminio reciclados, cuxa aplicación está prevista para 2033.

Segundo a Comisión Europea, estes obxectivos achegarán seguridade xurídica a fabricantes e investidores, favorecerán novos investimentos en capacidade de reciclaxe e contribuirán a manter os materiais dentro da economía europea durante máis tempo.

 O regulamento tamén introduce novos requisitos para que os vehículos sexan deseñados pensando no seu desmonte, reutilización e reciclaxe ao final da súa vida útil.

As novas normas mellorarán a información dispoñible sobre a substitución e retirada de compoñentes durante o uso do vehículo, facilitando tanto aos fabricantes como á industria da reciclaxe a recuperación de pezas e materiais de maior calidade.

Ademais, refórzanse as medidas destinadas a recuperar materias primas críticas, especialmente aluminio, cobre e terras raras, consideradas estratéxicas para a industria europea.

Rastrexabilidade e control

O novo regulamento endurece os requisitos de rastrexabilidade e control dos vehículos ao final da súa vida útil, establecendo criterios máis claros para diferenciar un vehículo usado dun destinado ao despezamento.

Así mesmo, desde mediados de 2031, unicamente poderán exportarse fóra da Unión Europea os vehículos que sexan aptos para circular, co obxectivo de evitar que aqueles considerados residuos sexan comercializados como vehículos de segunda man.

A regulación tamén reforza o principio de Responsabilidade Ampliada do Produtor (RAP), obrigando aos fabricantes a asumir os custos asociados á recollida e tratamento dos vehículos ao fin da súa vida útil. Ademais, amplía este sistema a novas categorías de vehículos, como camións, autobuses e motocicletas, fortalecendo a colaboración entre fabricantes e xestores de residuos.

A Comisión considera que o novo Regulamento representa un paso decisivo para consolidar unha industria automobilística máis sostible, resiliente e menos dependente de materias primas virxes.

Fonte: Comisión Europea