- O grupo, conformado por 60 persoas, mostrouse especialmente interesado nas distintas fases técnicas do proceso de tratamento de residuos, así coma nos sistemas de control ambiental utilizados para garantir a plena compatibilidade da actividade industrial co coidado da contorna e a saúde pública
Cerceda, 4 de maio de 2026.- Ao igual que en anos anteriores, o Grao de Enxeñaría Ambiental da Universidade de Santiago de Compostela (USC) repetiu visita ao Complexo industrial de Sogama en Cerceda para que o alumnado puidese complementar os seus coñecementos académicos en xestión de residuos municipais desde unha dimensión práctica.
Nesta ocasión, tratábase dun grupo moi numeroso, conformado por 60 persoas, e especialmente interesado nas distintas fases técnicas do proceso: desde o transvasamento do lixo nas plantas de transferencia ata o transporte e o tratamento da bolsa negra (fracción resto), da que se extrae a parte reciclable para enviar á industria transformadora e valorízase enerxeticamente a non reciclable para a súa conversión en electricidade (50% renovable), evitando que acabe en vertedoiro, a peor das opcións pola súa alta carga contaminante.
O control ambiental centrou boa parte das preguntas formuladas polos universitarios, interesándose no tratamento que se dispensaba ás augas residuais, nas medicións de axentes contaminantes, tecnoloxías utilizadas para garantir a plena compatibilidade da actividade industrial coa protección da contorna e a saúde pública, e perspectivas de futuro enmarcadas no novo plan estratéxico de Sogama para o período 2025-2030, centradas especialmente na reciclaxe do residuo téxtil, a transformación dixital e a descarbonización.
Ademais de realizar o percorrido guiado a pé, os integrantes do colectivo tamén tiveron a oportunidade de descubrir todos os recunchos das instalacións a través dunha visita virtual 360º, o que lles permitiu ter unha visión integral da actividade desta infraestrutura, cualificada como punteira na contorna europea e que, desde o pasado 1 de xaneiro, dá servizo a 304 concellos, o 97% do total de Galicia.
Saúdos, Departamento de Comunicación
