• Unha das principais novidades é o despregamento de RENET, unha ferramenta dixital que, ademais, permitirá que recicladores e operadores poidan acceder a materiais valorizables a través dunha pasarela específica
• O proxecto contempla ensaios técnicos para avaliar a viabilidade de reutilizar materiais procedentes de aparellos descartados na fabricación de novas redes e aparellos sostibles, avanzando cara a un modelo de “ciclo pechado”

Cerceda, 24 de febreiro de 2026.-A Confederación Española de Pesca (CEPESCA), xunto co Centro Tecnolóxico de Automoción de Galicia (CTAG) e a Federación Nacional de Confrarías de Pescadores (FNCP), activa o proxecto “Redes de España II”, contando coa colaboración da Fundación Biodiversidade e cofinanciado polo FEMPA (Fondo Europeo Marítimo, de Pesca e de Acuicultura), sendo o seu obxectivo impulsar o sistema de xestión de redes e aparellos de pesca descartados e acelerar o seu retorno á economía circular.

Durante os próximos 18 meses, o proxecto reforzará a implantación do modelo desenvolvido en Redes de España I mediante a súa dixitalización a través da plataforma RENET a fin de garantir a rastrexabilidade e a reciclaxe operativa de 15 toneladas de redes e aparellos desde a súa recollida en portos ata o seu tratamento e transformación en materia prima para novos produtos (por exemplo, pellets ou fibras). Esta ferramenta dixital permitirá solicitar retiradas, visualizar puntos de recollida e aplicar rastrexabilidade dixital desde a orixe ata o destino final de cada compoñente, facilitando ademais que recicladores e operadores poidan acceder a materiais valorizables a través dunha pasarela específica.

Redes de España II inclúe tamén accións específicas para anticipar a entrada en vigor da Responsabilidade Ampliada do Produtor (RAP) no ámbito de redes e aparellos: talleres sectoriais e encontros bilaterais con fabricantes, sesións informativas para armadores e entidades do sector, e despregamento de acordos con portos e organizacións.

O proxecto contempla ensaios técnicos para avaliar a viabilidade de reutilizar materiais procedentes de aparellos descartados na fabricación de novas redes e aparellos sostibles, avanzando cara a un modelo de “ciclo pechado” que reduza o uso de materias primas virxes e o destino final non valorizable.

Enfoque de inclusión e perspectiva de xénero

Ademais da dimensión ambiental e industrial, o proxecto incorpora accións de divulgación e posta en valor do coñecemento tradicional ligado á confección e reparación de redes e aparellos, con enfoque de inclusión e perspectiva de xénero, e con participación de entidades do ámbito social. Entre as accións previstas destacan: un taller demostrativo de confección tradicional; unha mesa redonda “Redes de pesca: tradición e innovación” con redeiras/redeiros, fabricantes e expertos en materiais sostibles; unha mostra itinerante “A rede que nos une”, deseñada para circular por lonxas, museos e feiras; e un catálogo/guía dixital de boas prácticas con solucións técnicas e testemuñas sobre materiais sostibles.

Fonte e imaxe: CEPESCA