• A asociación europea de provedores de tecnoloxía Waste-to-Energy considera que estas solucións poden reforzar a competitividade industrial, a seguridade enerxética e a circularidade en Europa
• Así mesmo, defende que as plantas de valorización enerxética sexan recoñecidas como infraestruturas estratéxicas capaces de apoiar ás agrupacións industriais mediante unha subministración enerxética estable e a recuperación de materias primas secundarias

Cerceda, 9 de marzo de 2026.- A European Suppliers of Waste-to-Energy Technology (ESWET) valorou positivamente a Industrial Accelerator Act (IAA) presentada pola Comisión Europea como unha iniciativa orientada a fortalecer a base manufactureira e a competitividade industrial do continente.

A organización considera que os provedores europeos de tecnoloxía de valorización enerxética de residuos (Waste-to-Energy, WtE) contribúen directamente aos obxectivos desta proposta e desempeñan un papel relevante no desenvolvemento de capacidades industriais estratéxicas en Europa.

Os membros de ESWET deseñan e fabrican equipos industriais complexos destinados ao tratamento seguro de residuos non reciclables, permitindo ao mesmo tempo recuperar enerxía e materiais. Estas tecnoloxías tamén están vinculadas ao desenvolvemento de solucións de captura de carbono, destinadas tanto á súa eliminación como á súa utilización.

Ademais da súa función na xestión de residuos, a valorización enerxética preséntase como un elemento facilitador da descarbonización de industrias intensivas en consumo enerxético. As instalacións WtE poden proporcionar electricidade e calor de forma continua —24 horas ao día, sete días á semana— cunha proporción superior ao 50 % de enerxía de orixe renovable, substituíndo fontes enerxéticas baseadas en combustibles fósiles dentro das agrupacións industriais.

Contribución á seguridade enerxética e á competitividade industrial

No actual contexto enerxético europeo, caracterizado por prezos do gas elevados e volátiles, especialmente para sectores como a industria química, dispoñer de fontes enerxéticas xestionables e producidas internamente considérase un factor crave para recuperar a competitividade e reducir a exposición a perturbacións externas na subministración.

Desde esta perspectiva, a valorización enerxética de residuos contribúe a reducir a dependencia do gas natural importado, reforzando a seguridade enerxética e diminuíndo a pegada de carbono de determinados produtos industriais estratéxicos.

Neste contexto, a asociación defende que as plantas de valorización enerxética sexan recoñecidas como infraestruturas estratéxicas capaces de apoiar ás agrupacións industriais mediante unha subministración enerxética estable e a recuperación de materias primas secundarias.

Recuperación de materias primas secundarias na economía circular

A Industrial Accelerator Act tamén debería, segundo a organización, reforzar o recoñecemento do papel das materias primas secundarias no desenvolvemento de mercados industriais competitivos. Metais como ferro e aluminio, así como minerais recuperados das escouras de fondo de incineración, permiten reducir a intensidade de carbono da produción industrial e aumentar a resiliencia das cadeas de subministración.

Neste sentido, ESWET considera que a contribución da valorización enerxética á subministración de materias primas críticas secundarias debería reflectirse de forma explícita nos requisitos de baixo carbono, así como en incentivos asociados ao uso de material reciclado na contratación pública e en distintos esquemas de apoio.

Fonte: ESWET