• Con este galardón honrarase a líderes cuxo traballo achega solucións para restaurar os ecosistemas mariños e costeiros, reducir os riscos climáticos e crear medios de vida sostibles
• A convocatoria está aberta ata o próximo 15 de abril e poden concorrer á mesma persoas, organizacións e entidades gobernamentais nas categorías de Liderado en Políticas, Inspiración e Acción, Visión Empresarial, e Ciencia e Innovación

Cerceda, 10 de marzo de 2026 – O Programa das Nacións Unidas para o Medio Ambiente (PNUMA) abriu o seu período de nominacións para o premio Campións da Terra 2026, o máximo galardón ambiental das Nacións Unidas, que este ano pon o foco en líderes á vangarda do coidado do océano, un ecosistema esencial para a vida na Terra que se atopa sometido a unha presión crecente.

A edición de 2026 busca nominacións de persoas, organizacións e gobernos que estean a impulsar esforzos para protexer e restaurar a saúde do océano —un ámbito crucial para a estabilidade do clima, a biodiversidade, a seguridade alimentaria e o desenvolvemento económico sostible—.

O océano cobre máis do 70 % do planeta, absorbe máis do 90% do exceso de calor xerada polas emisións de gases de efecto invernadoiro e capta aproximadamente un terzo do dióxido de carbono liberado pola actividade humana. Con todo, só o 15% das zonas costeiras permanece ecoloxicamente intacto. A contaminación, a perda de hábitats, o arrastre de sedimentos e as augas residuais sen tratar están a degradar os ecosistemas mariños, impulsando a perda de biodiversidade e ameazando ás comunidades que dependen do mar. A dispoñibilidade limitada de datos e a gobernanza fragmentada fan que a acción coordinada sexa aínda máis urxente.

Os premios Campións da Terra 2026 honrarán a líderes cuxo traballo achega solucións para restaurar os ecosistemas mariños e costeiros, reducir os riscos climáticos e crear medios de vida sostibles.

Áreas crave de enfoque do premio Campións da Terra deste ano:

1. Prevención da contaminación – Abordando a contaminación desde a fonte ata o mar, incluíndo as augas residuais, os nutrientes, os produtos químicos e os sedimentos, mediante solucións que conecten a terra, a auga doce, as costas e o océano.

2. Protección e restauración de ecosistemas – O fortalecemento da resiliencia do océano; a protección e restauración dos arrecifes de coral, os manglares, as praderías mariñas e outros hábitats esenciais; e a redución dos riscos climáticos para as comunidades costeiras.

3. Economías azuis sostibles – O respaldo a medios de vida xustos e sostibles que protexan a natureza e, ao mesmo tempo, amplíen as oportunidades económicas.

4. Ciencia, datos e cooperación – A expansión da investigación científica, os datos, o financiamento e as alianzas rexionais, mesmo mediante Convenios e Plans de Acción de Mares Rexionais, para acelerar o impacto colectivo.

Categorías e cronograma

A convocatoria  está aberta ata o próximo 15 de abril. Pódense nominar a persoas, organizacións e entidades gobernamentais nas categorías de Liderado en Políticas, Inspiración e Acción, Visión Empresarial, e Ciencia e Innovación. Os galardoados serán anunciados a finais deste ano.

Desde a súa creación en 2005, o premio Campións da Terra recoñeceu a 127 persoas.

Fonte e imaxe: ONU Medio Ambiente