• O sector advirte das dificultades para extraer materiais estratéxicos dos residuos electrónicos e subliña a necesidade de reforzar a cooperación cos fabricantes e mellorar os sistemas de recollida

Cerceda, 16 de xuño de 2026.- A recuperación de materias primas críticas a partir de residuos electrónicos e baterías perfílase como un dos grandes desafíos da economía circular europea. Así quedou de manifesto durante a última Convención e Exposición Mundial da Reciclaxe organizada por BIR (Bureau of International Recycling), celebrada en Gotemburgo (Suecia), onde representantes da industria reclamaron medidas que faciliten a reciclaxe destes materiais e melloren a colaboración ao longo de toda a cadea de valor.

Un das principais mensaxes lanzadas polos expertos foi a crecente complexidade dos aparellos eléctricos e electrónicos, que dificulta a identificación, extracción e valorización de elementos estratéxicos como as terras raras, o litio, o níquel ou o cobalto.

Segundo explicou Spyros Karamoutsos, director xeral da empresa grega de reciclaxe Ecoreset, os recicladores enfróntanse a importantes obstáculos para recuperar materias primas críticas debido á heteroxeneidade dos residuos electrónicos e á escasa información dispoñible sobre a localización destes materiais dentro dos produtos ao final da súa vida útil.

Durante a súa intervención, defendeu a necesidade de implantar sistemas de identificación e etiquetaxe máis claros que permitan coñecer a composición dos dispositivos, localizar as materias primas críticas e facilitar a súa desmontaxe.

Así mesmo, reclamou unha maior harmonización normativa na Unión Europea, tanto na clasificación dos residuos coma nos criterios de funcionamento dos operadores, co obxectivo de garantir condicións de competencia homoxéneas e favorecer a produción de materiais reciclados de alta calidade.

Karamoutsos tamén expuxo a conveniencia de adaptar os sistemas de cálculo das taxas de recollida ás características e vida útil de cada categoría de aparellos electrónicos, así como establecer sancións para aquelas prácticas que impliquen a retirada de compoñentes valiosos antes de que os equipos cheguen ás instalacións de tratamento.

Reciclaxe de baterías

Outro dos asuntos abordados foi o papel que desempeñará a reciclaxe de baterías na subministración futura de materias primas críticas.

Alexandre Gouy, analista da Axencia Internacional da Enerxía (AIE), destacou que os vehículos eléctricos representan xa ao redor do 20% das vendas mundiais de automóbiles e que esta proporción podería superar o 50% en 2035.

Esta transformación está a incrementar significativamente a demanda de minerais estratéxicos. Segundo lembrou, un vehículo eléctrico de batería consome aproximadamente seis veces máis minerais críticos que un automóbil con motor de combustión interna, mentres que as baterías e os vehículos eléctricos concentran xa preto da metade da demanda mundial de litio.

Para a próxima década, Gouy sinalou que as baterías fóra de uso acabarán superando os residuos de fabricación como principal fonte de alimentación para a industria da reciclaxe de baterías.

Mellora dos sistemas de recollida

Os expertos coincidiron en que a expansión da capacidade de reciclaxe deberá ir acompañada dunha mellora substancial dos sistemas de recollida.

Segundo as estimacións presentadas durante o encontro, taxas de recollida próximas ao 90% permitirían cubrir entre o 25% e o 30% da demanda de litio, níquel e cobalto mediante produción secundaria. Con todo, se a recollida se limitase ao 50%, esa contribución descendería ata un intervalo de entre o 15% e o 20%.

Fonte: Residuos Profesional