• Tivo lugar esta mesma mañá no Viveiro de Empresas de Cerceda, sendo o seu obxectivo dar a coñecer os perfís profesionais máis demandados polas compañías asentadas neste municipio e arredores

Cerceda, 23 de marzo de 2026.- Representantes de Sogama participaron esta mañá nunha xornada que, baixo o título “Conectando Persoas, Empresas e Emprego”, e organizada pola Confederación de Empresarios da Coruña (CEC), pretendía dar a coñecer os perfís profesionais máis demandados polas empresas asentadas en Cerceda e contorna.

O encontro, focalizado sobre todo en persoas en procura activa dun posto de traballo, mozos en proceso de incorporación ao mercado laboral e profesionais que se atopan valorando novas opcións, enmarcábase no proxecto ActivaVerde, cuxo obxectivo é favorecer a recualificación profesional e a empregabilidade nos territorios afectados polo peche das centrais térmicas de Meirama e As Pontes, dentro do proceso de transición á neutralidade climática.

Impulsado pola Xunta de Galicia, no marco do compromiso do Goberno galego co desenvolvemento dun mercado laboral máis sostible e orientado ás novas oportunidades que xorden ao redor das tecnoloxías verdes e a eficiencia enerxética, está financiado polo Fondo Europeo de Transición Xusta.

A xornada, que tivo lugar no Viveiro de Empresas Municipal de Cerceda, foi inaugurada polo alcalde da localidade, Juan Manuel Rodríguez, e contou coas achegas de compañías tales como Grupo Malasa, Grupo Lence, Grupo CercedaSol, ASER (Asociación de Empresarias Rurais) e Reymar, ademais de Sogama.

Saúdos, Departamento de Comunicación