• Esta distinción recoñece as súas contribucións á economía circular global mediante o tratamento de augas residuais e a ampliación do acceso á auga limpa, a loita contra a contaminación plástica e a creación de alternativas sostibles a materiais convencionais

Cerceda, 9 de outubro de 2025. – Tres emprendedores ambientais de India, Quenia e EE.UU foron galardoados polo Programa das Nacións Unidas para o Medio Ambiente (PNUMA) co premio "Mozos Campións da Terra". Esta distinción recoñece as súas contribucións á economía circular global mediante o tratamento de augas residuais e a ampliación do acceso á auga limpa, a loita contra a contaminación plástica e a creación de alternativas sostibles a materiais convencionais.

Os gañadores recibirán financiamento inicial, titoría, apoio en comunicacións e unha plataforma global para expoñer e escalar as súas solucións.

O programa Young Champions ou Mozos Campións, que o PNUMA fundou en 2017, relanzouse este ano en asociación co Sr. Kemper, quen en 2023 foi designado promotor de alianzas do PNUMA para mobilizar recursos e accións ao redor dos problemas ambientais máis urxentes da actualidade.  Kemper é o presidente, fundador e director executivo da empresa estadounidense de tecnoloxía climática Palmetto e un filántropo climático.

• Jinali Mody (28 anos, India): graduouse en bioquímica no St. Xavier’s College de Mumbai e en estudos ambientais na Escola de Medio Ambiente da Universidade de Yale. Jinali fundou Banofi Leather, unha empresa dirixida por mulleres, con sede na India, que ten como obxectivo facer máis sostible o negocio da moda rápida mediante a produción de alternativas ao coiro fabricadas a partir de refugallos de cultivos de banano. En comparación co coiro convencional, Banofi reduce drasticamente o uso de auga, a produción de refugallos tóxicos e as emisións de CO₂.

• Joseph Nguthiru (27 anos, Quenia): Enxeñeiro en tecnoloxía climática, a súa empresa, HyaPak,  converte a especie exógena de xacinto que invadiu o lago Naivasha en bolsas de empaquetado e envoltorios biodegradables para plántulas. Ao substituír produtos e plástico dun só uso, HyaPak compensa as emisións de CO₂ propias dos mesmos e facilita que as terras agrícolas sexan máis saudables.

• Noemi Florea (24 anos, EE. UU.): desenvolveu Cycleau, un compacto sistema de reutilización de auga, en consulta con ducias de comunidades marxinadas. Co mesmo, a súa empresa LÆRO transforma augas grises en auga potable. Instalado debaixo de lavabos, duchas e unidades de lavandería, Cycleau reduce significativamente as augas residuais, utilizando moita menos enerxía que os sistemas alternativos.

O premio "Mozos Campións da Terra" é a iniciativa insignia do PNUMA ao redor da participación xuvenil. Desde 2017, recoñeceu a 30 mozos pioneiros (activistas, empresarios e innovadoras ambientais menores de 30 anos) polas súas ideas sobresaíntes para protexer o medio ambiente.

Fonte e imaxe: ONU Medio Ambiente