- O obxectivo destes galardóns é visibilizar e recoñecer aquelas iniciativas, proxectos e traxectorias que contribúen significativamente á sostibilidade, a economía circular e a innovación no ámbito do medio ambiente
- O prazo para a presentación de candidaturas finaliza o próximo 25 de outubro
Cerceda, a 10 de xullo de 2025.- A Asociación Profesional de Empresas Ambientais de Galicia (APROEMA) abriu a convocatoria para a VII Edición dos Premios Medio Ambiente APROEMA 2025, cuxo obxectivo é visibilizar e recoñecer aquelas iniciativas, proxectos e traxectorias que contribúen significativamente á sostibilidade, a economía circular e a innovación no ámbito do medio ambiente.
Estes galardóns consolidáronse como unha cita de referencia en Galicia para a promoción das boas prácticas ambientais, reafirmando Aproema o seu compromiso de poñer en valor o traballo de entidades públicas e privadas, centros educativos, organizacións sociais, profesionais e medios de comunicación que están a impulsar un cambio positivo na nosa contorna.
A convocatoria está aberta a candidaturas de toda España que se encadren nalgunha das seguintes categorías: entidades públicas, entidades privadas, empresas e centros académicos (Universitario, Secundaria, Graos Medios e Superiores de FP, e Educación Primaria).
O prazo para a presentación de candidaturas conclúe o próximo 25 de outubro, debendo materializarse a través dun formulario que se atopa ao dispor dos interesados na plataforma do concurso https://premios.aproema.com/presenta-a túa-candidatura-2025. Bases: https://premios.aproema.com/bases-vi-edicion-premios-medio-ambiente-aproema-2025/
Sogama formará parte do Xurado dos Premios, xunto cun representante da FEGAMP, da USC e da Xunta Directiva de Aproema.
A entrega de premios terá lugar nun acto institucional que se celebrará no mes de novembro do ano en curso, nun enclave emblemático de Galicia, coa presenza de representantes do sector ambiental, autoridades autonómicas, medios de comunicación e entidades sociais.
Fonte e imaxe: APROEMA
