• O estudo revela avances en produtividade de recursos e eficiencia material, pero advirte grandes retos en reciclaxe e no uso circular de materiais, coa particularidade de que o país duplica a media europea de residuos en vertedoiro

Cerceda, 6 de novembro de 2025.- A Fundación Cotec para a Innovación publicou a quinta edición do seu Informe de Economía Circular, elaborado xunto á Asociación para la Sostenibilidad y el Progreso de las Sociedades (ASYPS), no que analiza a evolución da transición circular en España.

O estudo introduce por primeira vez indicadores sistémicos aliñados co novo marco europeo de seguimento, integrando os impactos ambientais, climáticos e socioeconómicos da economía circular, e revela un dato preocupante: España necesitaría os recursos de 3,6 planetas como a Terra para manter o seu nivel actual de consumo, fronte aos 3,28 planetas de media na UE. Este cálculo baséase na pegada de consumo, un novo indicador que mide o impacto ambiental total dos bens e servizos, incluíndo o uso da terra, auga, carbono e materiais.

Aínda que España está por riba da media europea, o informe sinala que outros países presentan cifras aínda maiores, como Dinamarca (4,1), Países Baixos (4,03) ou Alemaña (3,79). É por isto que Cotec alerta da urxencia de reorientar os patróns de consumo para axustarse aos límites planetarios e cumprir os obxectivos de sostibilidade fixados pola UE para 2030.

Malia esta situación, o estudo indica que España desacoplou parcialmente o crecemento económico do uso de materiais. En 2024 xerou 3,53 euros por cada quilogramo de material utilizado, fronte aos 2,8 €/kg de 2015, situándose por riba da media europea (2,99 €/kg).

A pegada material tamén mostra melloras: pasou de 13,47 toneladas per cápita en 2010 a 7,98 t/pc en 2023, por baixo da media europea (14,07 t/pc) debido á redución do peso de sectores intensivos en materiais, como a construción ou a minería, e a unha maior eficiencia industrial.

Así mesmo, destácase a posición de España en reparación e mantemento de produtos (1.112,26 € por fogar en 2023) e en reutilización de augas residuais, ámbitos nos que  mostra un rendemento superior á media comunitaria.

Baixa circularidade e exceso de vertedura: principais desafíos

A principal marxe de mellora está na taxa de uso circular de materiais, que en España é do 8,5%, fronte ao 12% da UE. Países como Francia (18%) ou Países Baixos (31%) lideran a transición, mentres que o obxectivo europeo para 2030 é do 23,4%.

En xestión de residuos municipais, España recicla só o 41%, lonxe do obxectivo do 55% para 2025 e do 60% para 2030. Ademais, o país duplica a media europea de residuos enterrados en vertedoiro (223 kg por persoa en 2023), un dato que pon en risco o cumprimento da meta comunitaria de non superar o 10% para 2035.

O estudo conclúe que o país aínda debe acelerar a redución do consumo de materiais, incrementar a taxa de reciclaxe e favorecer a innovación empresarial para cumprir os obxectivos do II Plan de Acción de Economía Circular 2024-2027.

Fonte: Fundación COTEC