• Este organismo advirte que hai un 91% de probabilidades de que, alomenos un ano entre 2026 e 2030, supere o límite de 1,5 °C do Acordo de París
• O informe subliña que, aínda que as tendencias son preocupantes, hai marxe para influír no clima futuro: cada tonelada de CO₂ evitada conta e cada política de adaptación implementada salva vidas

Cerceda, 28 de maio de 2026.-A Organización Meteorolóxica Mundial (OMM) acaba de facer pública a súa actualización máis alarmante ata a data. As conclusións do informe “Predicións Climáticas Anuais a Decenais 2026-2035” debuxan un escenario claro: a Terra entra nunha década de calor extrema, con récords de temperatura case asegurados e riscos climáticos en aumento.

O informe, elaborado con datos de 13 centros científicos internacionais e 250 simulacións climáticas, proxecta que a temperatura media global entre 2026 e 2030 situarase entre 1,3 °C e 1,9 °C por riba dos niveis de 1850-1900, coa particularidade de que hai un 86% de probabilidades de que se bata un récord anual, superando o máximo histórico rexistrado en 2024 (1,55 °C). E, aínda que é "moi probable superar temporalmente 1,5 °C, continúa a ser excepcionalmente improbable (<1%) que a media de cinco anos alcance os 2°C”.

O documento aclara que “estas proxeccións non significan que fracasásemos no Acordo de París. O limiar de 1,5 °C refírese a medias de 20 anos, non a anos individuais. Pero cada fracción de grao conta: os impactos intensifícanse con cada incremento."

Non obstante, o quecemento non será uniforme. O Ártico seguirá quentándose a máis de 3,5 veces a velocidade global, con invernos ata 2,8 °C máis cálidos que a media recente. Isto acelerará a perda de xeo mariño no mar de Barents e o mar de Bering, con consecuencias para ecosistemas e comunidades indíxenas.

Pola súa banda, o sureste de Europa podería recuperar invernos máis chuviosos tras anos de seca.

É máis probable que se desenvolvan as condicións que favorecen a aparición do fenómeno do Neno durante este período, con maior intensidade cara a 2027-2028. Os modelos indican que hai un 64% de probabilidades de que as temperaturas na zona crave do Pacífico se manteñan por riba da media, o que podería desencadear ondas de calor, secas e inundacións en rexións tropicais.

A diferenza das proxeccións a 30 ou 50 anos, este informe parte do estado actual do clima (temperatura dos océanos, xeo mariño, etc.) e usa modelos avanzados para anticipar os próximos anos con maior precisión. Trátase así dunha fotografía máis precisa do que podería ocorrer nun futuro próximo, o que permite a gobernos e sectores crave (agricultura, xestión da auga, saúde pública) anticiparse e adaptarse.

O informe subliña que, se ben as tendencias son preocupantes, aínda hai marxe para influír no clima futuro: cada tonelada de CO₂ evitada conta e cada política de adaptación implementada salva vidas.

Fonte e imaxe: ONU