Idiomas

SIGNUS transformou o pasado ano máis de 200.000 toneladas de pneumáticos en novos materiais

Print this pagePrint this pagePrint this page
  • O 11,4% destinouse á preparación para reutilización (pneumático de segundo uso ou recauchutado), o 36,4% a valorización enerxética e o 52,3% restante reciclouse nas diferentes plantas de transformación existentes en España
  • Así se recolle na Memoria de actividade desta organización correspondente ao exercicio 2021.

Cerceda, a 22 de setembro de 2022.- Tal e como se recolle na súa Memoria de actividade de 2021, SIGNUS xestionou o pasado ano  200.286 toneladas de pneumáticos fóra de uso, que converteu en novos produtos de utilidade para diferentes aplicacións.

Do total recollido, o 11,4% destinouse á preparación para reutilización (pneumático de segundo uso ou recauchutado), o 36,4% a valorización enerxética e o 52,3% restante reciclouse nas diferentes plantas de transformación existentes en España.

Entre os principais usos aos que se destinou o material obtido, destacan 28.318 toneladas de granulado de caucho utilizado como recheo en preto de 280 campos de fútbol de céspede artificial, 20.767 toneladas para a construción de aproximadamente 4.100 parques infantís e 1.674 toneladas de po de caucho que se incorporaron en 160 quilómetros de estradas, entre outros.

Gabriel Leal, director xeral de SIGNUS, subliña que 2021 foi o ano da recuperación do mercado de reposición español, incrementando a xestión nun 17,3% respecto do exercicio anterior. Así mesmo, destaca a xestión, por primeira vez, dos pneumáticos cun diámetro superior a 1.400 mm, obrigación engadida recentemente no Real Decreto correspondente.

SIGNUS encárgase da recollida en practicamente a totalidade dos talleres que cambian pneumáticos no noso país (25.820 en 2021). Traballa tamén da man de empresas privadas, universidades e centros tecnolóxicos co obxectivo de garantir o futuro da reciclaxe dos pneumáticos e poñer en valor todos os seus compoñentes.

RESTRICIÓN DO USO DE MICROPLÁSTICOS

Durante o pasado ano, gran parte dos seus esforzos e estudos realizados están relacionados coa proposta de restrición de uso de microplásticos engadidos intencionadamente, que prohibiría o emprego de granulado de caucho como recheo nos campos de céspede artificial.

Nesta liña, SIGNUS puxo en marcha un proxecto de monitorización dun campo de fútbol de céspede artificial co fin de avaliar a eficacia das medidas de contención que evitarían a liberación destas partículas ao medio ambiente.

En paralelo, houbo outros desenvolvementos en diferentes sectores produtivos tales como pastillas de freo ou pantallas acústicas de formigón con caucho reciclado, ademais de estudos relacionados co emprego de po de caucho en estradas, unha das actuais aplicacións de reciclaxe que non termina de alcanzar o gran potencial de consumo que ten.

https://www.signus.es/memoria2021/inicio  

Fonte e imaxe: SIGNUS

22 Set 2022

Galería