- A Asociación Española do Aluminio considera este material un recurso estratéxico para a descarbonización, a competitividade industrial e a autonomía da Unión Europea
Cerceda, 30 de xullo de 2026.-A Asociación Española do Aluminio (AEA) reclamou o desenvolvemento dunha estratexia industrial específica para a xestión da chatarra de aluminio en Europa, co obxectivo de garantir a dispoñibilidade deste recurso crítico para a industria, reforzar a competitividade do sector e avanzar na transición enerxética e a autonomía estratéxica da Unión Europea.
A organización, que representa a máis de 650 empresas do sector, defende a necesidade de impulsar medidas que permitan reter unha maior cantidade de chatarra dentro do mercado europeo, incrementar a capacidade de reciclaxe, simplificar a regulación e impulsar novos investimentos en innovación.
Lembra que Europa exporta desde hai anos máis chatarra de aluminio da que importa e que estes fluxos aumentaron significativamente, especialmente cara a países asiáticos como India, China, Malaisia, Tailandia ou Paquistán. Ademais, advirte do risco de que unha maior cantidade de material se desvíe cara Estados Unidos debido ás novas políticas arancelarias.
Para a Asociación, esta situación compromete a subministración de materia prima para a industria europea da reciclaxe e debilita a autonomía estratéxica do continente.
Estratexia baseada en catro eixos
A AEA apoia a proposta de European Aluminium de implantar un arancel ou taxa á exportación de chatarra de aluminio fóra da Unión Europea como ferramenta para corrixir as distorsiones do mercado internacional e favorecer que unha maior parte do material permaneza en Europa. Non obstante, considera que esta medida debe integrarse nunha estratexia máis ampla sustentada en catro liñas de actuación.
A primeira consiste en mellorar a clasificación, recollida e reciclaxe da chatarra, especialmente das fraccións de menor calidade, que representan aproximadamente o 80% do material exportado e para as que xa existen tecnoloxías capaces de facilitar o seu aproveitamento.
O segundo eixo pasa por reter unha maior proporción de chatarra dentro do mercado europeo mediante instrumentos comerciais axeitados, prestando especial atención ás fraccións de alta calidade reutilizables pola industria cunha pegada de carbono reducida.
A estratexia inclúe tamén a simplificación da regulación e a harmonización de estándares e requisitos entre os distintos países europeos para reducir as cargas administrativas que dificultan novos investimentos.
Finalmente, a Asociación reclama impulsar o investimento e a innovación tecnolóxica co fin de incrementar a capacidade europea de reciclaxe e producir aluminio secundario de alta calidade.
A AEA destaca que a capacidade de reciclaxe instalada en España aproxímase a 1,5 millóns de toneladas anuais, unha cifra que considera estratéxica para fortalecer a economía circular e reducir a dependencia exterior na subministración de materias primas.
Fonte: AEA
