• No evento, celebrado na Fundación Pablo VI, déronse a coñecer as novidades e tendencias ao redor deste modelo de xestión de residuos, cunha salientable implantación na UE e principal instrumento para reducir a vertedura
• A transición cara ao residuo cero, a economía da valorización enerxética, o seu papel nos modelos avanzados de economía circular e a súa dimensión política, foron algunhas das temáticas abordadas nas mesas redondas
• De forma paralela, celebrouse o Aeversu Tech, espazo concibido para o diálogo tecnolóxico e no que expertos e empresas líderes expuxeron os seus últimos desenvolvementos tecnolóxicos
• O peche do Encontro veu da man de Toni Nadal, adestrador, conferenciante e embaixador da Rafa Nadal Academy

Madrid, 29 de setembro de 2026.-O presidente de Sogama, Javier Domínguez, acompañado pola directora xeral, Mirta Sueiro, asistiu en Madrid (Fundación Pablo VI) ao II Aeversu Summit, Encontro Global sobre Valorización Enerxética que reuniu aos principais actores do sector a fin de dar a coñecer as novidades e tendencias ao redor dun modelo de xestión de residuos cunha salientable implantación na UE e que, grazas á súa operativa, permite reducir de forma significativa as taxas de vertedura, contribuíndo a avanzar cara ao cumprimento dos obxectivos europeos en materia de residuos.

Ante un aforo próximo a ao medio milleiro de asistentes, o acto inaugural do evento, protagonizado polo presidente de Aeversu (Asociación de Empresas de Valorización Enerxética de Residuos Urbanos), Joaquín Pérez Viota, así como pola máxima responsable de ISWA (Solid Waste Association), Bettina Kamuk, e o viceconselleiro de Medio Ambiente, Agricultura e Ordenación do Territorio da Comunidad de Madrid, Rafael García González, contou cunhas palabras do Ministro de Industria e Turismo, Jordi Hereu.

Mesas redondas, cápsulas de innovación e conferencia inspiracional

A través da organización de catro mesas redondas nas que participaron altos cargos de distintas administracións públicas, así como de empresas tecnolóxicas e de xestión de residuos, abordáronse temáticas de gran interese  como a transición cara ao residuo cero, a economía da valorización enerxética, o papel desta dentro dos modelos avanzados de economía circular e a súa integración en cidades e industrias a través da produción de electricidade, calor, vapor industrial e outros vectores enerxéticos. Así mesmo,  a súa dimensión política deu lugar a un debate en clave de país no que participaron representantes de distintos grupos parlamentarios.

O programa complementouse con dúas cápsulas de innovación: a primeira virou ao redor da concepción artística da planta WtE de Spittelau, localizada no corazón Viena, configurándose en exemplo de como o deseño pode transformar a percepción social dunha infraestrutura destas características; e, a segunda, sobre a Intelixencia artificial e o redeseño da cadea de valor.

Ademais, un relatorio a cargo de Jesús Barbero, Market Research Xestor de IO Investigación, desvelou posibles liñas de acción para fomentar o interese dos cidadáns polos proxectos de xestión de residuos.

Logo da clausura, que correu a cargo do presidente de Aeversu, así como da directora de CEWEP, Ella Stengler, e o presidente da Comisión de Transición Ecolóxica do Senado, José Ángel Alonso Pérez, o peche do Encontro veu da man de Toni Nadal, adestrador, conferenciante e embaixador da Rafa Nadal Academy.

Aeversu Tech

Unha das grandes novidades da edición 2026 foi a celebración do AEVERSU Tech, un espazo concibido para o diálogo tecnolóxico, con programa propio e no que expertos e empresas líderes do sector deron a coñecer os seus últimos desenvolvementos tecnolóxicos.

Saúdos, Departamento de Comunicación