• Os expertos coinciden en que enfrontar os desafíos ambientais require non só solucións tecnolóxicas ou políticas públicas, senón tamén sociedades informadas, comprometidas e con capacidades para actuar.
• Pola súa banda, as escolas resilientes ao clima axudan a protexer á infancia fronte a fenómenos meteorolóxicos extremos e a garantir a continuidade da aprendizaxe

Cerceda, 23 de febreiro de 2026.-Os expertos coinciden en que enfrontar os desafíos ambientais require, non só solucións tecnolóxicas ou políticas públicas, senón tamén sociedades informadas, comprometidas e con capacidades para actuar. E aquí é onde entra en escena a educación, de importancia transcendental para construír un futuro mellor e alcanzar a Axenda 2030 para o Desenvolvemento Sostible.

Desde as aulas ata as comunidades, e desde iniciativas locais ata movementos globais, estas son cinco das formas nas que a educación está a impulsar a acción polo medio ambiente.

1. Investir nos estudantes é investir no futuro

A educación desde idades temperás é fundamental para comprender o mundo natural e a relación da humanidade con el. Ao fortalecer a alfabetización ambiental, o pensamento crítico e as habilidades para a resolución de problemas, as escolas contribúen a lograr unha cidadanía informada, capaz de tomar decisións ambientalmente responsables.

Iniciativas como #GenerationRestoration Schools, liderada polo Decenio das Nacións Unidas sobre a Restauración dos Ecosistemas, en alianza coa Foundation for Environmental Education (FEE), apoian a escolas de todo o mundo para ensinar e actuar en favor da natureza, permitindo que os estudantes aprendan sobre o medio ambiente participando en proxectos prácticos de restauración de ecosistemas.

2. Fóra da aula, a aprendizaxe ambiental ensina habilidades para a vida

Máis aló dos espazos escolares, as modalidades de educación non formal tamén desempeñan un papel crave no fortalecemento da conciencia ambiental. Talleres, grupos de formación e programas comunitarios empoderan aos mozos para colaborar, mobilizarse e enfrontar desafíos nas súas comunidades. 

Por exemplo, o Tide Turners Plastic Challenge, parte da campaña #SinContaminaciónPorPlásticos do PNUMA, involucra a mozos de todo o mundo a través de redes existentes. En alianza co Movemento Scout Mundial e Girl Guides, chegou a máis de 800.000 mozos, demostrando o poder da acción a nivel comunitario.

3. Universidades pola restauración dos ecosistemas

Ao integrar a restauración dos ecosistemas no ensino, a investigación, as operacións e as cadeas de subministración, as universidades están a transformar os seus campus en laboratorios vivos para a recuperación da natureza.

Por exemplo, máis de 700 institucións de educación superior en máis de 100 países forman parte de Nature Positive Universities (Universidades Positivas coa Natureza), unha rede global dedicada a deter e reverter a perda de biodiversidade mediante accións como a restauración de hábitats, a vixilancia da biodiversidade e proxectos de infraestrutura sostible. Estas accións melloran as contornas urbanas e as paisaxes locais, contribuíndo ao desenvolvemento dun futuro positivo para a natureza.

4. Os estudantes xa son axentes de cambio

Estudantes de todo o mundo están a explorar, documentando e comunicando os desafíos ambientais. A través do xornalismo, a narración de historias e as plataformas dixitais, os mozos comparten solucións e inspiran a outros a actuar.

Programas como Young Reporters for the Environment (YRE), levan máis de 30 anos formando e acompañando a miles de futuros líderes ambientais. Moitos xornalistas e defensores do medio ambiente comezaron o seu camiño a través de YRE, onde desenvolveron habilidades para investigar problemáticas, informar sobre desafíos locais e apoiar iniciativas centradas en solucións.

5. As aulas están a prepararse para o futuro

Segundo unha análise recente de UNICEF, alomenos 242 millóns de estudantes en 85 países viron interrompida a súa educación debido a crises climáticas en 2024, incluídas ondas de calor, tormentas, inundacións e secas. Nalgúns contextos, estas interrupcións repetidas puxeron en risco o dereito dos nenos e nenas á educación.

As escolas resilientes ao clima axudan a protexer á infancia fronte a fenómenos meteorolóxicos extremos e a garantir a continuidade da aprendizaxe. Por exemplo, nunha das rexións máis vulnerables á calor na India, Supriya Sahu, laureada do Premio Campións da Terra do PNUMA, impulsou medidas de arrefriado e solucións baseadas na natureza para protexer a familias e escolas. Proxectos como o Cool Roof Project en escolas públicas “verdes” reducen a temperatura nos espazos interiores e melloran as condicións de aprendizaxe, asegurando que a educación poida continuar.

Fonte: ONU Medio Ambiente

Imaxe: Freepik