• O Encontro anual, no que participaron entidades tales como COGERSA, MARE, GARBIKER e GHK, ademais de SOGAMA, alcanzou a súa IV edición e celebrouse onte e hoxe en Santiago e Cerceda respectivamente
• O obxectivo deste evento é intercambiar coñecementos, experiencias, problemáticas e solucións, ademais de afianzar a colaboración
• Onte, os máximos responsables de cada empresa expuxeron as novidades na súa xestión, á vez que se desenvolveron diversos talleres de traballo nos que se abordaron temáticas tales como a innovación, a contratación, a transformación dixital e a comunicación, entre outras
• O Encontro foi clausurado hoxe, no Complexo Medioambiental de Cerceda, pola conselleira de Medio Ambiente e Cambio Climático, Ángeles Vázquez

Cerceda, 28 de novembro de 2025.- Baixo a organización de Sogama, Galicia acolleu onte e hoxe (27 e 28 de novembro), o IV Encontro de Empresas Públicas de xestión de residuos da Cornixa Cantábrica, un evento de carácter itinerante que se vén celebrando desde fai catro anos coa pretensión de intercambiar coñecementos, experiencias, problemáticas e solucións, ademais de afianzar a colaboración nun ámbito, o dos residuos, que non entende de fronteiras e que precisa do compromiso e implicación de todos.

A xornada de onte, que tivo lugar en Santiago de Compostela, contemplou as exposicións, a cargo dos máximos responsables de cada entidade, das  novidades na súa xestión, así coma dos proxectos a abordar nos próximos meses coa pretensión de seguir gañando en eficiencia, de prestar un servizo público de máxima calidade e de reforzar o traballo de cara ao cumprimento dos esixentes obxectivos europeos no ámbito da recuperación e a reciclaxe.

Pedro Ruíz Rodríguez, director xeral de MARE; Jon Saenz de Viguera Erkiaga, director xerente de GARBIKER; César Gimeno Sandig, director xeral de GHK; Beatriz García Muñiz, directora técnica de COGERSA, e Javier Domínguez Lino, presidente executivo de SOGAMA, coincidiron en sinalar que as empresas públicas da cornixa cantábrica evolucionaron substancialmente no seu labor, polo que, máis aló de xestionar e tratar residuos, tamén son xeradoras de recursos, desempeñando un papel crave na transición dos seus territorios cara a un modelo de desenvolvemento sustentado na economía circular.

Así mesmo, desenvolvéronse distintos grupos de traballo (Xerencia; Operación técnica, innovación e protección ambiental; Comunicación interna e externa, relacións cos grupos de interese e dixitalización; Ámbito xurídico, contratación e recursos humanos) cuxas conclusións foron compartidas na xornada desta mañá, que tivo lugar na sede de Sogama, onde os integrantes das distintas compañías puideron realizar unha visita virtual e guiada a pé polas distintas plantas que conforman o Complexo cercedense.

O acto de clausura do Encontro correu a cargo da conselleira de Medio Ambiente e Cambio Climático, Ángeles Vázquez, que estivo acompañada pola directora xeral de Calidade e Sostibilidade, Mª José Echevarría.

Saúdos, Departamento de Comunicación