• Acolle con satisfacción a nova Estratexia de Bioeconomía da UE, considerándoa un fito relevante na folla de roteiro comunitaria cara á descarbonización e a mellora da xestión dos recursos

• Subliña que a recollida selectiva de biorresiduos debe complementarse con sistemas capaces de tratar a fracción bioxénica residual que permanece unha vez esgotadas as opcións de prevención, reutilización e reciclaxe, converténdoa en enerxía parcialmente renovable

Cerceda, 2 de decembro de 2025.-A nova Estratexia de Bioeconomía da Unión Europea, que establece un conxunto de medidas para facer un uso máis sostible, resiliente e circular dos recursos biolóxicos en Europa, foi acollida con satisfacción por ESWET (Asociación que agrupa aos provedores europeos de tecnoloxía de valorización enerxética de residuos), considerándoa un fito relevante na folla de roteiro comunitaria cara á descarbonización e a mellora da xestión dos recursos.

A Estratexia subliña a importancia da enerxía baseada en biomasa para a seguridade de subministración, especialmente cando procede de correntes residuais que non xeran presións ambientais adicionais e complementan a outras fontes renovables; un enfoque que, a xuízo de ESWET, encaixa co papel xa consolidado das plantas Waste-to-Energy (WtE) en Europa, responsables de xestionar residuos bioxénicos inevitables, recuperar enerxía parcialmente renovable e materiais, evitar emisións de metano asociadas á vertedura e contribuír a un uso máis circular dos recursos.

A Asociación salienta que estas instalacións sitúanse no tramo final da xerarquía de residuos, convertendo a fracción non reciclable en enerxía estable que reforza a seguridade enerxética e apoia os procesos de descarbonización. En consecuencia, considera esencial que o apoio comunitario se estenda tamén ás tecnoloxías capaces de valorizar de forma eficiente os residuos bioxénicos non reciclables. Priorizar solucións avanzadas de Waste-to-Energy e aplicacións de captura de carbono permitiría reforzar notablemente a capacidade de Europa para alcanzar as súas metas de circularidade, eficiencia de recursos e neutralidade climática.

Neste sentido, subliña que a separación en orixe e a recollida selectiva de biorresiduos, impulsadas pola Comisión, deben complementarse con sistemas capaces de tratar a fracción bioxénica residual que permanece unha vez esgotadas as opcións de prevención, reutilización e reciclaxe. Esta biomasa secundaria non recuperable convértese así, nas plantas WtE, en enerxía parcialmente renovable que contribúe ás redes de calefacción urbana, a seguridade de subministración e a descarbonización do mix enerxético europeo.

Coherencia regulatoria

Con vistas ao futuro, ESWET convida á Comisión a garantir que os procesos lexislativos derivados da Estratexia de Bioeconomía se manteñan aliñados cos obxectivos globais da UE en materia de enerxía, clima, medio ambiente e circularidade. En particular, insiste en que as futuras revisións da Directiva de Enerxías Renovables (REDE III) teñan en conta a contribución da fracción bioxénica dos residuos tratada en instalacións de Waste-to-Energy, tanto en termos de enerxía renovable producida como de remocións de carbono bioxénico.

Fonte: ESWET

Imaxe: Freepik