• Ambas entidades reforzarán a súa colaboración para facer fronte aos desafíos da xestión sostible da biodiversidade en todos os sectores agrícolas.
•  O Director Xeral da FAO  asegurou que a biodiversidade resulta esencial para mellorar a produción agrícola e alimentaria e para conservar os recursos e ecosistemas do noso planeta.

Cerceda, a 22 de xullo de 2020.-  No marco do debate virtual “O Pacto Verde Europeo: diálogo sobre a forza transformadora das estratexias Da granxa á mesa e sobre Biodiversidade da UE para crear sistemas alimentarios saudables e sostibles", celebrado o pasado mes de xuño, púxose de relevo a necesidade de reforzar a colaboración entre a FAO e a UE para afrontar os desafíos da xestión sostible da biodiversidade en todos os sectores agrícolas.

No seu discurso inaugural, o Director Xeral da Organización das Nacións Unidas para a Alimentación e a Agricultura (FAO), QU Dongyu, asegurou que, para lograr a sostibilidade a escala mundial, necesítase algo máis que solucións técnicas e dixitais, xa que “implica decisións clave sobre políticas”, ao que engadiu que "A biodiversidade é vital para mellorar a produción agrícola e alimentaria e para conservar os recursos e ecosistemas do noso planeta", pedindo desta forma un maior esforzo para evitar que a súa perda socave a resiliencia de moitos sistemas agrícolas e supoña unha grave ameaza para a seguridade alimentaria mundial.

Jan Tombinski, Representante Permanente da UE ante os organismos das Nacións Unidas con sede en Roma, referiuse aos dous alicerces fundamentais do Pacto Verde Europeo: as estratexias "Da granxa á mesa" e sobre Biodiversidade. Indicou que ambos promoven un enfoque integrado que reflicte o valor real da natureza e os servizos que nos proporcionan os ecosistemas, en particular en relación coa agricultura e a seguridade alimentaria.

Cabe recordar que, a finais de 2019, a CE aprobou o Pacto Verde Europeo, unha ampla folla de ruta para desenvolver a economía circular de Europa, loitar contra o cambio climático e preservar a biodiversidade, os océanos e os bosques.

No debate tamén participaron, por parte da Comisión Europea, Sabine Juelicher, Directora de Seguridade de Alimentos e Piensos da Dirección Xeral de Saúde e Seguridade Alimentaria; John Clarke, Director de Relacións Internacionais da Dirección Xeral de Agricultura; Humberto Delgado Rosa, Director de Capital Natural da Dirección Xeral de Medio Ambiente; e Carla Montesi, Directora de Planeta e Prosperidade da Dirección Xeral de Cooperación Internacional e Desenvolvemento. Estiveron acompañados por Maria Helena Semedo, Directora Xeral Adxunta da FAO.

Fonte: FAO

Imaxe: Pixabay