• Presenta tamén a edición 2025 das Directrices de Ecodeseño para o Reciclado específicas para os envases de cartón que conteñan líquidos

Cerceda, a 6 de agosto de 2025.- A Alianza do Cartón para Bebidas e Alimentos (FBCA) anunciou o lanzamento de RECY:CHECK, un protocolo de certificación de reciclabilidade para envases fabricados a base de fibra (FBCP). A este lanzamento únese a publicación da edición 2025 das Directrices de Ecodeseño para o Reciclado (DfR) específicas para envases de cartón que conteñan líquidos (LPCs, polas súas siglas en inglés).

«RECY:CHECK e as novas Directrices son moito máis que unhas ferramentas técnicas: son instrumentos estratéxicos para avanzar cara a unha economía circular», afirma Sebastian Bartels, director xeral de FBCA. «Permítennos falar cunha soa voz sobre reciclabilidade, aliñarnos coas normativas europeas que se están a desenvolver, e empoderar a todos os actores da cadea de valor -desde deseñadores e produtores ata recicladores e responsables políticos- para tomar decisións fundamentadas e con visión de futuro», engade.

O novo protocolo consiste nunha metodoloxía que certifica a reciclabilidade de envases fabricados a base de fibra, avaliando o seu comportamento nas etapas de recollida, clasificación, reciclado e aplicación final. Aínda que está deseñada para apoiar o cumprimento da proposta de Regulamento Europeo de Envases e Residuos de Envases (PPWR), a súa aplicación vai máis aló do ámbito europeo.

Pola súa banda, a actualización das Directrices de Ecodeseño incorpora as recomendacións técnicas máis recentes para asegurar a compatibilidade dos LPCs coas plantas especializadas na reciclaxe do compoñente de polietileno e aluminio (PolyAl). Foron elaboradas polo Centro de Coñecemento de FBCA e o seu grupo de traballo técnico, e están especialmente dirixidas a:

• Deseñadores de envases e marcas que queiran mellorar a reciclabilidade.

• Recicladores e reprocesadores que avalían a compatibilidade dos materiais.

• Responsables de sistemas colectivos de responsabilidade ampliada do produtor (SCRAP) e encargados de políticas públicas neste ámbito.

Fonte: FBCA

Imaxe: Freepik