- Así o manifesta a recoñecida chef venezolana Grace Ramírez, quen apoia a campaña das Nacións Unidas “Actúa Agora” e a ONG Kitchen Connection, compartindo consellos na materia.
- Recomenda aos cidadáns que vaian a restaurantes onde se preocupen polos agricultores, por ter produtos sostibles, e que lles importe de onde vén a súa carne ou peixe.
- Defende tamén a correcta xestión dos refugallos orgánicos a través da compostaxe, obtendo así un abono natural e ecolóxico que aporta riqueza ás plantas e cultivos.
- Así mesmo, chama a atención sobre a necesidade de minimizar os envases plásticos, evitar os desbotables dun só uso e levar a propia bolsa reutilizable da casa á compra.
Cerceda, a 13 de novembro de 2019.- Consumir de forma responsable, priorizar os alimentos de tempada, aproveitar as sobras para novos menús e transformar os restos alimentarios non comestibles en compost, son algunhas das receitas recomendadas pola recoñecida chef venezolana Grace Ramírez para reducir o desperdicio alimentario e axudar a combater o cambio climático desde a cociña.
Foi en Nova Zelanda, país no que actuou como xuíza do programa de cociña My Kitchen Rules, onde descubriu a súa paixón pola sostibibilidade e por ensinar aos máis novos sobre a posibilidade de usar a cociña como un instrumento para protexer o medio ambiente.
Actualmente, apoia a campaña das Nacións Unidas “Actúa Agora” e a ONG Kitchen Connection, e comparte con frecuencia unha serie de consellos con Noticias ONU para contribuír a facer fronte ao grave problema que representa o desperdicio e a perda de alimentos, con serias consecuencias ambientais, económicas e sociais.
Consumir produtos de tempada é unha das principais recomendacións de Ramírez, concibíndoa como unha estratexia crucial para evitar a pegada de carbono que deixa o transporte de froitas e verduras desde lugares afastados. “Non podemos seguir comendo fresas no inverno. Non podemos seguir comendo cousas que veñen desde moi lonxe simplemente polo feito de que nos satisfai a curto prazo”, explica.
Recomenda aos cidadáns que vaian a restaurantes onde se preocupen polos agricultores, por ter produtos sostibles, e que lles importe de onde vén a súa carne ou peixe. Defende tamén a correcta xestión dos residuos orgánicos a través da compostaxe, obtendo así un abono natural e ecolóxico que aporta riqueza ás plantas e cultivos.
Así mesmo, chama a atención sobre a necesidade de minimizar os envases plásticos, evitar os desbotables dun só uso e levar a propia bolsa reutilizable da casa á compra. “Trátase de usar a menor cantidade de plástico que podamos e reciclar o pouco que teñamos”, sinala.
A chef recoñece que o tema da sostibilidade ten unha gran amplitude, pero móstrase convencida de que realmente os consumidores temos o poder de cambiar o rumbo do mundo a través da toma de conciencia.
Fonte: ONU News
Imaxe: Pixabay
Saúdos, Departamento de Comunicación
