• O informe “What a Waste 3.0” apunta a brechas críticas en recollida e tratamento, especialmente en países de renda baixa, e reclama acelerar a transición cara a modelos circulares

Cerceda, 13 de abril de 2026.- O Banco Mundial advirte que, de non adoptar medidas estruturais, a xeración mundial de residuos urbanos podería aumentar un 50% de aquí a 2050, pasando de 2.560 millóns de toneladas en 2022 a 3.860 millóns. Así se recolle no informe “What a waste 3.0”, que analiza a evolución global do sector e os seus principais desafíos.

O crecemento demográfico, a urbanización acelerada, o aumento da renda e os cambios nos patróns de consumo están a impulsar un incremento de residuos que supera a capacidade de xestión de moitos sistemas locais, especialmente en países en desenvolvemento.

Mentres que os países de renda alta, que representan o 16% da poboación mundial, xeran o 29% dos residuos, os países de renda media-alta concentran o 42% do total, e os de renda baixa apenas xeran o 4%.

Estas diferenzas reflíctense tamén nos sistemas de recollida, alcanzando as economías de renda alta taxas próximas ao 100%, que caen ao 28% nas de renda baixa.

Se se atende ao tratamento, as disparidades son aínda máis acusadas. Nos países de renda alta, practicamente a totalidade dos residuos se xestionan en instalacións controladas, cumprindo os estándares internacionais. Pola súa banda, nos de renda baixa só recibe un tratamento axeitado o 3% dos residuos, predominando vertedoiros incontrolados e a queima aberta.

A nivel global, os residuos orgánicos constitúen a maior fracción, cun 38% do total, o que formula retos específicos para a súa recollida separada e tratamento, especialmente fóra dos países máis desenvolvidos.

A xestión de residuos urbanos representa, de media, o 6% dos orzamentos municipais, cun peso maior en países de menor renda. Malia este esforzo, moitas cidades non logran cubrir a totalidade do servizo nin recuperar custos operativos.

O informe sinala que os ingresos por taxas adoitan ser insuficientes, especialmente en economías emerxentes, onde as tarifas poden situarse ao redor de 10 dólares por fogar ao ano, fronte a máis de 500 dólares en países de renda alta. Esta brecha contribúe a déficits estruturais de financiamento e á persistencia de carencias en infraestruturas.

Pese ao escenario de presión crecente, o Banco Mundial subliña que o sector ofrece oportunidades relevantes en termos de creación de emprego, innovación e desenvolvemento económico, especialmente se se adoptan enfoques de economía circular.

Neste contexto, o organismo insiste na necesidade de acelerar os investimentos, mellorar a gobernanza e reforzar os sistemas de datos e seguimento. Do contrario, advirte que as brechas actuais poderían ampliarse, incrementando os custos ambientais, sanitarios e económicos asociados a unha xestión inadecuada dos residuos.

Fonte: Residuos Profesional