• A empresa pública subministrou ao ente local 50 composteiros, con capacidade para 400 litros, así como outros tantos cubos domiciliarios de 10 litros e manuais didácticos de apoio para os veciños participantes

• O vindeiro venres, 20 de marzo, técnicos de Sogama desprazaranse a esta localidade pontevedresa  para impartir un curso de formación orientado aos usuarios

Cerceda, 13 de marzo de 2026.- O Concello de Vila de Cruces (Pontevedra) formalizou a súa adhesión ao programa de compostaxe doméstica impulsado por Sogama en Galicia co obxectivo de beneficiarse das súas vantaxes ambientais e económicas.

Tendo en conta que a materia orgánica representa preto do 40% na composición media dunha bolsa de lixo doméstico tipo, se esta porcentaxe se autoxestiona en orixe, evítase o seu depósito no contedor xenérico e, polo tanto, o seu tratamento en planta industrial, o que pode derivar nun aforro de custos para as arcas locais.

Igualmente, con esta iniciativa o Concello recupera unha práctica tradicional no rural galego, como é a segregación de restos orgánicos para alimento do gando e/ou elaboración de abono, pero dunha forma máis hixiénica, cómoda e eficiente.

Con tal fin, Sogama subministrou ao ente local un total de 50 composteiros, con capacidade para 400 litros e fabricados con materiais reciclados e reciclables, así coma outros tantos cubos marróns de 10 litros para transportar os restos de alimentos e sobras desde as cociñas ata o recipiente no que terá lugar o proceso de fermentación.

Para participar nesta iniciativa, os veciños deben habitar en vivendas unifamiliares que dispoñan de terreo no que aplicar o compost resultante, pechando o ciclo de valorización da materia orgánica, que regresa á terra en forma de abono para dar unha nova vida, configurándose esta práctica como todo un exemplo de economía circular.

Formación presencial e apoio didáctico

Así mesmo,  o próximo 20 de marzo, técnicos de Sogama desprazaranse a Vila de Cruces para impartir un curso de formación orientado aos usuarios, que se celebrará, ás 19:00 horas, no local social de Santo Tomé de Obra, e no que explicarán a operativa a seguir para obter un compost de alta calidade: desde a localización do composteiro, que debe situarse no exterior da vivenda, nunha zona protexida das inclemencias meteorolóxicas e en contacto directo coa terra para propiciar o acceso dos microorganismos descompoñedores, ata a relación dos refugallos que poden e non poden introducirse no mesmo, así coma o seguimento e control dos distintos parámetros que inflúen no resultado final, como son o osíxeno, a temperatura e a humidade. Con todo, e co obxectivo de que as familias poidan instruírse en maior medida, a compañía tamén entregou ao Concello manuais didácticos de apoio.

Más de 8.500 composteiros repartidos na provincia

A día de hoxe, xa son 129 as entidades pontevedresas adscritas ao programa de compostaxe doméstica de Sogama (48 concellos, 72 centros educativos e 9 colectivos sociais), tendo distribuído entre as mesmas, de forma gratuíta, máis de 8.500 composteiros.

Saúdos, Departamento de Comunicación