• Así se recolle nun informe recente elaborado por Prognos Consulting e o Instituto ifeu

• No mesmo advírtese de que o metano é un dos contaminantes climáticos de vida curta máis potentes, cun impacto decisivo tanto no quecemento a curto prazo como na desestabilización climática a longo prazo

• Os autores do estudo  conclúen que a forma máis eficaz de reducir as emisións de metano é evitar desde a orixe que os residuos biodegradables cheguen aos vertedoiros, en liña coa xerarquía europea e os principios da economía circular

Cerceda, 4 de febreiro de 2026.- Un novo estudo advirte de que o metano procedente dos residuos municipais depositados en vertedoiros de Europa constitúe un risco climático de gran magnitude que segue a infravalorarse nos debates sobre políticas públicas.

O metano é un dos contaminantes climáticos de vida curta máis potentes, cun impacto decisivo tanto no quecemento a curto prazo como na desestabilización climática a longo prazo.

O informe, titulado “Emisións de metano dos vertedoiros europeos: escenarios e desafíos dos datos”,  e publicado o pasado mes de xaneiro, foi elaborado por Prognos Consulting e o Instituto ifeu. No mesmo analízanse as emisións de metano derivadas dos residuos urbanos depositados en vertedoiros da UE-27 e o Reino Unido desde 2022 e avalía o seu impacto climático moito máis aló de mediados de século.

O estudo subliña que, aínda que as taxas de vertedura diminúan, as emisións de metano non se deteñen, xa que os residuos enterrados continúan emitindo gas durante varias décadas, mesmo logo do peche dos  vertedoiros.

Nun escenario de “statu quo”, os autores estiman que ao redor de 1.900 millóns de toneladas de residuos municipais depositados entre 2022 e 2050 xerarían preto de 1.500 millóns de toneladas de CO₂ equivalente (GWP 100) ata o ano 2130. De forma especialmente relevante, o 37 % destas emisións produciríase despois de 2050, cando a eliminación de residuos xa finalizaría.

A plena aplicación da lexislación europea en materia de residuos —que limita a vertedura de residuos municipais ao 10 % en 2035— permitiría reducir aproximadamente á metade estas emisións, pero aínda así deixaría uns 700 millóns de toneladas de CO₂ equivalente bloqueadas ao longo do tempo. Segundo o estudo, este legado de metano é incompatible co obxectivo de neutralidade climática da UE para 2050.

Os autores apuntan a que a forma máis eficaz de reducir as emisións de metano é evitar desde a orixe que os residuos biodegradables cheguen aos vertedoiros, en liña coa xerarquía de residuos e os principios da economía circular.

 Advertencia

A Asociación Europea de Valorización Enerxética de Residuos (ESWET) advirte de que determinadas decisións políticas incoherentes poderían agravar o problema. En particular, alerta dos riscos asociados aos debates sobre a inclusión da valorización enerxética de residuos (WtE) no Réxime de Comercio de Dereitos de Emisión (RCDE) da UE.

Se a política climática penaliza o tratamento controlado de residuos non reciclables sen reflectir adecuadamente o impacto moito maior do metano nos vertedoiros, existe o risco de que os residuos se desvíen novamente cara á vertedura, incrementando as emisións.

Reducir as emisións de metano de forma urxente perfílase como unha condición indispensable para frear o quecemento global e manter ao alcance os obxectivos climáticos europeos.

Fonte e imaxe: ESWET