• Desenvolvido por Cepesca, o CTAG e a FNCP, os seus resultados daranse a coñecer na xornada “Do fin de vida a un sistema de xestión”, que terá lugar o próximo 14 de xaneiro en Madrid

Cerceda, 8 de xaneiro de 2026.- O proxecto Redes de España, desenvolvido pola Confederación Española de Pesca (Cepesca), o Centro Tecnolóxico de Automoción de Galicia (CTAG) e a Federación Nacional de Confrarías de Pescadores (FNCP), logrou recuperar 101 toneladas de redes e aparellos de pesca descartados (ARPD) dentro dunha iniciativa cuxo fin último é validar un modelo operativo para a recollida, rastrexabilidade e valorización de ARPD ao final da súa vida útil e abrir un debate práctico sobre os próximos pasos cara a un sistema escalable.

Xornada para comunicar resultados

Os resultados da iniciativa, froito do compromiso do sector pesqueiro español coa sostibilidade e o desenvolvemento da economía circular, daranse a coñecer na xornada “Do fin de vida a un sistema de xestión”, que terá lugar o próximo 14 de xaneiro, en Madrid, e á que tamén se poderá asistir en liña.

O encontro estará especialmente enfocado a compartir coñecemento e boas prácticas, promover a colaboración e establecer contacto con diferentes actores que tamén están a traballar neste campo. Estruturarase en tres mesas redondas cuxas temáticas se centran nos tres piares do proxecto ‘Redes de España’: xestión, rastrexabilidade e innovación.

Co título ‘Da RAP (Responsabilidade Ampliada do Produtor) a un sistema operativo: gobernanza, despregamento e aprendizaxes’, a primeira mesa, que estará moderada por Cepesca, centrarase en identificar as claves para pasar da RAP “en deseño” a unha operativa real, determinando roles crave, así como principios e boas prácticas na materia. Na mesma participarán expertos de Procircular e o MITECO.

Na segunda mesa, denominada ‘Do dato ao sistema: rastrexabilidade e evidencias unha RAP robusta’, e moderada pola FNCP, daranse a coñecer enfoques e ferramentas que xa se están a utilizar noutros sectores para que a operativa da rastrexabilidade sexa simple e escalable. Contará coas intervencións da directora do proxecto DMP – Dixital MarineLitter Passport da Fundación Ecoalf, ARUP e RecyClass.

O obxectivo da terceira mesa, denominada ‘Roteiros de valoración: límites reais e condicións de viabilidade’, que moderará o CTAG, é concretar os roteiros viables para o avance e os requisitos mínimos nesta progresión, desde un dobre punto de vista material e de rastrexabilidade para aliñar así as expectativas cos límites técnicos e económicos. Con tal fin, participarán, entre outros, representantes da multinacional española Antolín, líder no deseño, desenvolvemento e fabricación de compoñentes e módulos para o interior de automóbiles, Cementos Molins, un portavoz do proxecto RheoNet da Universidade de Salamanca (USAL) e unha profesional redeira.

O proxecto Redes de España desenvolveuse coa colaboración da Fundación Biodiversidade do MITECO, a través do Programa Pleamar, e está cofinanciado pola Unión Europea a través do Fondo Europeo Marítimo, de Pesca e de Acuicultura (FEMPA).

Fonte: CEPESCA