• Identifica os vertedoiros incontrolados como un dos principais focos emisores, cun 20%, e outorga ao sector dos residuos un papel estratéxico dentro da folla de roteiro de mitigación ao integrar solucións baseadas na captura de biogás, valorización da materia orgánica e substitución da vertedura

Cerceda, 28 de xullo de 2026.-Nacións Unidas fixo un chamamento para reducir, con carácter urxente, as emisións de metano (CH₄), dado o seu papel crítico na aceleración do quecemento global a curto prazo. Aínda que a súa permanencia na atmosfera é inferior á do CO₂, o metano presenta un potencial de quecemento aproximadamente 80 veces superior, o que o converte nun gas crave na xestión climática inmediata.

A proposta internacional identifica tres grandes ámbitos emisores e establece estratexias específicas de intervención para cada un: o sector dos combustibles fósis, responsable de aproximadamente o 38% das emisións de metano; a agricultura e gandería, con preto do 42%; e os vertedoiros incontrolados de residuos, co 20%. Neste último caso, o eixo de actuación pasa pola eliminación destes puntos negros, a captura e aproveitamento do biogás, o desenvolvemento de sistemas urbanos de economía circular aplicados a residuos orgánicos e a expansión de infraestruturas de valorización, substituíndo á vertedura.

A implementación coordinada destas e outras medidas sectoriais permitiría unha redución potencial de ata o 32% das emisións globais nesta década, cunha parte maioritaria de accións consideradas de baixo custo relativo e alta dispoñibilidade tecnolóxica.

Fonte: Gestores de Residuos