• Os fenómenos extremos provocaron a suspensión de clases, danos nos edificios académicos, o paso ao ensino a distancia, a redución do tempo de instrución, unha menor asistencia escolar e un maior risco de abandono
• Tres cuartas partes dos estudantes afectados viven en países de ingresos baixos e medios-baixos

Cerceda, 21 de setembro de 2026.- Segundo un novo informe de UNICEF, a escolarización de preto de 171 millóns de estudantes de todo o mundo viuse interrompida por perigos climáticos en 2025, o que se traduce en aproximadamente un de cada dez estudantes, desde preescolar ata o final da secundaria.

As tormentas foron a causa máis común das interrupcións, afectando a 109 millóns de estudantes, seguidas das inundacións e as ondas de calor.

Estes fenómenos extremos, derivados do cambio climático, provocaron a suspensión de clases, danos nas escolas, o paso ao ensino a distancia, a redución do tempo de instrución, unha menor asistencia escolar e un maior risco de abandono.

Agárdase que o patrón climático do Neno, máis forte que nunca, aumente o risco de fenómenos meteorolóxicos extremos nos próximos meses.

Aínda que os estudantes de todos os niveis de ingresos víronse afectados polas interrupcións, tres cuartas partes dos afectados viven en países de ingresos baixos e medios-baixos, xa que os seus sistemas educativos a miúdo carecen dos recursos necesarios para salvagardar a aprendizaxe durante as emerxencias climáticas.

Así mesmo, as nenas teñen máis probabilidades que os nenos de abandonar as escolas. Cando as instalacións académicas e sanitarias resultan danadas, as familias desprázanse e perden ingresos, polo que as nenas tenden a recibir responsabilidades adicionais de coidado e recollida de auga.

Consecuencias a longo prazo

A menos que se tomen medidas claras para axudalos, os estudantes que sufriron interrupcións escolares relacionadas co clima en 2025 poderían perder acumulativamente alomenos 200.000 millóns de dólares en ingresos ao longo da súa vida, segundo o informe.

A escala macroeconómica, as perdas de aprendizaxe e as maiores taxas de abandono escolar poden reducir a produtividade da man de obra, retardar o crecemento económico e dificultar que os países reduzan a pobreza.

É por isto que UNICEF pide aos gobernos de todo o mundo que invistan máis en sistemas educativos e infraestruturas resilientes ao clima "para protexer a educación dos nenos de hoxe e das xeracións futuras".

Fonte: ONU