• O acordo anterior, rubricado polas partes para mediados de 2022, baixo a presidencia de Félix Juncal, rexedor de Bueu, vence o próximo 31 de xullo

• Dado que a Mancomunidade é titular da instalación, e tendo en conta que o canon de Sogama aglutina a transferencia, o transporte e o tratamento dos residuos, o convenio configúrase como un mecanismo de compensación económica orientado a mellorar a operativa da instalación e contribuír á súa maior eficiencia

Cerceda, 17 de marzo de 2025.- A presidenta da Mancomunidade do Morrazo, Leticia Santos, xunto coa xerente da entidade, Alba Álvarez, viaxaron esta mañá a Cerceda (A Coruña) para reunirse co presidente de Sogama, Javier Domínguez, e sentar as bases para a renovación do convenio de colaboración relativo á xestión da planta de transferencia da Portela, que dá servizo aos Concellos de Cangas, Bueu e Moaña.

O anterior acordo, rubricado en xullo de 2022, baixo a presidencia do alcalde de Bueu, Félix Juncal, para un período de 4 anos, vencerá o próximo 31 de xullo.

Dado que o canon de Sogama inclúe no mesmo concepto a transferencia, o transporte e o tratamento dos residuos, e tendo en conta que a Mancomunidade do Morrazo é a titular da instalación da Portela, a achega económica desta empresa pública pretende servir como mecanismo de compensación para mellorar a súa operativa e contribuír á súa maior eficiencia.

En todo caso, o convenio constitúe un claro exemplo de cooperación institucional co que se busca o mellor resultado ambiental global no tratamento dos refugallos e a máxima eficiencia no uso de recursos públicos, conforme á lei 6/2021, do 17 de febreiro, de Residuos e Solos Contaminados de Galicia.

Logo do encontro, a presidenta e a xerente da Mancomunidade tiveron a oportunidade de coñecer de primeira man a actividade do Complexo Mediombiental de Cerceda, onde se centralizan os residuos (bolsa negra e bolsa amarela) procedentes dos 304 concellos adheridos ao sistema Sogama. Nesta infraestrutura lévase  a cabo, con tecnoloxías de última xeración, a segregación dos materiais reciclables para remitir aos centros recicladores, así como a valorización enerxética, é dicir, a transformación en enerxía eléctrica, da parte non reciclable, evitando con isto o uso do vertedoiro, a opción máis contaminante e nociva para a contorna e a saúde.

Para tomar boa nota do proceso, as representantes da Mancomunidade realizaron primeiro un percorrido virtual 360º, adentrándose en cada unha das plantas que integran o Complexo, que complementaron cun percorrido guiado a pé no que estiveron acompañadas por un técnico da compañía.

Saúdos, Departamento de Comunicación