• Así reza o lema co que se conmemora o Día Mundial da Loita contra a Desertificación e a Seca, que se celebra hoxe, 17 de xuño
• Cada segundo degrádase a terra equivalente a catro campos de fútbol, o que trae consigo repercusións globais: desde o aumento dos prezos dos alimentos ata a inestabilidade e a migración
• Se as tendencias actuais se manteñen, será necesario restaurar 1.500 millóns de hectáreas e investir 1 billón de dólares para 2030

Cerceda, a 17 de xuño de 2025.- Baixo o lema “Restaurar a terra, xerar oportunidades”, hoxe celébrase o Día Mundial da Loita contra a Desertificación e a Seca, poñendo de relevo como a restauración de terras pode crear empregos, fortalecer a seguridade alimentaria e hídrica, apoiar os obxectivos climáticos e aumentar a resiliencia económica.

Máis da metade do PIB mundial depende da natureza, polo que unha terra sa está na base de economías prósperas. Con todo, este capital natural esgótase a un ritmo alarmante: cada segundo degrádase a terra equivalente a catro campos de fútbol, o que provoca a perda de biodiversidade, aumenta o risco de seca e despraza a comunidades. As repercusións son globais: desde o aumento dos prezos dos alimentos ata a inestabilidade e a migración. Tendo en conta que o 40% da superficie terrestre está degradada, atopámonos ante un dos retos ambientais máis acuciantes do noso tempo.

A medida que o Decenio das Nacións Unidas para a Restauración dos Ecosistemas 2021-2030 chega ao seu ecuador, é crucial redobrar os esforzos para restaurar terras a escala planetaria. Se as tendencias actuais se manteñen, será necesario restaurar 1.500 millóns de hectáreas e investir 1 billón de dólares para 2030.

Fonte e imaxe: ONU