• A pretensión desta campaña é dar resposta concreta a unha das causas máis habituais do ineficiente uso deste contedor: depositar as caixas sen encartar
• Alén de reforzar a concienciación cidadá, o proxecto atópase desenvolvendo un piloto que incorporaría un sistema de panca ou pedal nos contedores para facilitar que os usuarios esmaguen as súas caixas
• Esta idea emana de Circular Talent Lab XVI, o programa de innovación de Ecoembes que conecta talento mozo con retos reais da economía circular

Cerceda, 6 de abril de 2026.- Ecoembes puxo en marcha a iniciativa “Todo encaixa, esmaga a túa caixa”, orientada a mellorar o rendemento do contedor azul para papel e cartón a través dun xesto sinxelo, pero decisivo: encartar as caixas antes de depositalas no mesmo. Máis aló do seu tamaño ou frecuencia de recollida, preténdese así dar resposta a unha das situacións que, de forma reiterada, afecta ao correcto uso deste recipiente.

O incremento das compras en liña e a maior circulación de embalaxes de cartón mudaron os hábitos de consumo, aumentando a cantidade de caixas que chegan ao contedor azul. Cando se depositan sen encartar, xeran ocos, reducen a capacidade efectiva do contedor, dificultan o aproveitamento do seu volume interior e xeran situacións de desbordamento.

Neste contexto, xorde a iniciativa “Todo encaixa, esmaga a túa caixa”, creada co obxectivo de reforzar a concienciación cidadá e tamén de facilitar que os usuarios poidan esmagar as súas caixas no lugar de recollida. É por iso que o proxecto atópase desenvolvendo un mecanismo piloto en forma de panca ou pedal no contedor, evitando que se xeren grandes espazos baleiros.

Esta idea emana de Circular Talent Lab XVI, o programa de innovación de Ecoembes que conecta talento mozo con retos reais da economía circular, explorando novas solucións para optimizar a xestión dos residuos e reforzar a eficacia do sistema de reciclaxe.

Fuente e imaxe: Ecoembes