• A Directiva non conseguiu incentivar eficazmente o desenvolvemento dun mercado de materias primas secundarias nin harmonizar a calidade do tratamento en toda a UE

Cerceda, a 10 de xullo de 2025.-A Comisión Europea publicou unha avaliación da Directiva sobre Residuos de Aparellos Eléctricos e Electrónicos (RAEE) que, se ben pon de relevo avances significativos no axeitado tratamento deste tipo de residuos, tamén revela importantes deficiencias estruturais que impiden alcanzar os seus obxectivos.

A normativa, vixente desde hai máis de 20 anos, continúa a ser altamente relevante para reducir os impactos ambientais e na saúde humana deste fluxo de residuos, o que crece máis rápido en Europa.

Entre 2012 e 2021, a recollida de RAEE creceu notablemente na UE, pero segue sen alcanzarse o obxectivo do 65% fixado na Directiva. En 2022, só Bulgaria, Letonia e Eslovaquia lograron cumprilo. A falta de infraestruturas, o comercio ilegal e a baixa concienciación pública son algúns dos principais obstáculos.

Ademais, ao redor do 50% dos RAEE xerados seguen sen recollerse, o que supón unha enorme perda de materiais valiosos como cobre, terras raras ou galio, claves para a transición verde e dixital.

A avaliación sinala tamén a escasa recuperación de materias primas críticas (CRM), xa que só o 40% do total de RAEE recíclase actualmente. A Directiva non conseguiu incentivar eficazmente o desenvolvemento dun mercado de materias primas secundarias nin harmonizar a calidade do tratamento en toda a UE: apenas o 23% das plantas de reciclaxe aplica estándares de alta calidade.

Outro punto débil é a fragmentación dos sistemas de Responsabilidade Ampliada do Produtor (EPR), con importantes lagoas no seu cumprimento, especialmente por parte de vendedores en liña.

A Comisión utilizará esta avaliación para preparar a revisión da Directiva RAEE dentro do paquete lexislativo da Acta de Economía Circular. Formúlase ampliar o alcance a novos equipos tecnolóxicos e verdes, definir estándares obrigatorios de tratamento e mellorar o deseño para a reciclabilidade desde o inicio.

Fonte: Comisión Europea

Imaxe: Freepik