• A conselleira de Medio Ambiente e Cambio Climático clausurou o ‘IV Encontro de empresas públicas de xestión de residuos da cornixa cantábrica’
• O Executivo autonómico pon en valor que a comunidade é unha das máis sostibles de España na xestión dos refugallos grazas á súa aposta clara pola transformación dixital e a mellora continua de todos os procesos
• A conselleira subliña que a Xunta ten claros os seus obxectivos para avanzar no eido medioambiental e entre eles está que Sogama pase de ser unha empresa pública de xestión de residuos a ser unha empresa xeradora de recursos
• A Administración galega defende que este encontro con representantes de Galicia, Asturias, Cantabria e Euskadi permite reforzar a cooperación, compartir experiencias e inquedanzas e buscar solucións aos retos da xestión dos residuos urbanos

Cerceda (A Coruña), 28 de novembro de 2025.-A conselleira de Medio Ambiente e Cambio Climático, Ángeles Vázquez, clausurou hoxe o IV Encontro de empresas públicas de xestión de residuos da cornixa cantábrica, onde destacou o esforzo realizado en Galicia para valorizar os residuos e reducir ao máximo os envíos a vertedoiro. Ese traballo permitiu que a comunidade teña unha taxa de vertido de apenas o 27%, practicamente 20 puntos menos que a media española, que é do 46,7%, e avanza con paso firme cara ao obxectivo de acadar o vertido técnico cero.

A responsable autonómica salientou que os datos de 2023 sobre a xestión dos residuos urbanos -que o Goberno central publicará proximamente- mostran que Galicia é unha das comunidades que menos refugallos envía a vertedoiro pois aposta claramente pola transformación dixital e a mellora continua dos procesos.

Nesta liña, puxo en valor o proxecto Traza, que permitirá seguir a trazabilidade do residuo desde que entra no complexo medioambiental da Sociedade Galega do Medio Ambiente (Sogama), en Cerceda, ata que sae convertido en recurso, xa sexa en forma de materiais clasificados ou de enerxía renovable xerada a partir da fracción non reciclable.

A conselleira indicou que a isto se engade a robotización e o uso da intelixencia artificial -que se vai incorporar para gañar en eficiencia nos procesos industriais- así como o novo portal do cliente, que facilitará un diálogo máis fluído cos concellos ofrecéndolles en tempo real os datos necesarios para mellorar a xestión e reducir custos.

Oportunidades

Ángeles Vázquez, que estivo acompañada pola directora xeral de Calidade Ambiental e Sostibilidade, María José Echevarría, e polo presidente de Sogama, Javier Domínguez, asegurou que o Executivo galego ten claros os seus obxectivos e que entre eles está que que a empresa pública con sede en Cerceda pase de xestionar residuos a ser unha empresa xeradora de recursos. É algo fundamental, incidiu, tendo en conta que hai materias primas que son limitadas e escasas, polo que é imprescindible buscar o xeito de converter os refugallos nunha oportunidade.

Precisamente, explicou a conselleira, ese é o principio do que partiu a construción da primeira planta pública de clasificación de residuos téxtiles de España, unha obra que está en marcha e que se prevé que estea rematada a mediados de 2026 tras un investimento de máis de 22 millóns de euros.

A representante da Xunta subliñou que esta é unha infraestrutura clave para axudar aos concellos a cumprir a normativa vixente e pechar o círculo da xestión dos distintos refugallos e, ao mesmo tempo, integrará a dimensión social pois xerará emprego preferentemente para persoas con discapacidade ou en risco de exclusión social.

A finalidade do Executivo galego é contribuír a unha moda circular que fuxa da cultura de usar e tirar e reforce a aposta pola sostibilidade, polo respecto ao medio ambiente e polo progreso socioeconómico da súa contorna.

Esa filosofía, defendeu Ángeles Vázquez, debe imperar en todos os ámbitos á hora de xestionar os residuos partindo da base de que a mellor maneira de reducir o volume de refugallos é evitar a súa produción. Por iso, salientou a bondade de encontros coma este entre empresas públicas de distintas comunidades pois permiten compartir experiencias, problemáticas, inquedanzas e solucións aos retos que presentan o medio ambiente e a xestión dos residuos urbanos.

Nesta liña, a conselleira asegurou que este momento -a Semana Europea da Prevención de Residuos- é o mellor para abordar cuestións como o xeito de fomentar a reutilización dos produtos ou o impulso da reciclaxe mediante unha correcta separación en orixe. Trátase de algo de suma importancia ante os exixentes obxectivos marcados a nivel europeo que urxen a reforzar coñecementos, aproveitar as sinerxías e avanzar nunha xestión cada vez máis sostible dos refugallos en beneficio do medio ambiente.

Evento

Este IV Encontro de empresas públicas de xestión de residuos da cornixa cantábrica reuniu entre onte e hoxe en Galicia -onte en Santiago de Compostela e hoxe en Cerceda- a representantes de Cogersa (Asturias), MARE (Cantabria), GHK (Euskadi) e a propia Sogama para avanzar na cooperación, posta en común e intercambio de experiencias que axuden ás empresas a mellorar os seus servizos e afrontar con maiores garantías os retos aos que se enfronta cada territorio.

Este evento, de carácter itinerante, celébrase nesta ocasión en Galicia despois de pasar por Euskadi en 2024, por Asturias en 2023 e por Cantabria en 2022. Nos relatorios, debates e mesas de traballo celebradas ao abeiro deste encontro avalíanse sistemas, resultados e medidas; compártense experiencias de éxito; refórzase a innovación; e apórtase unha visión técnica, humana, cultural e laboral que contribúe a facer fronte aos desafíos da xestión dos residuos.

Por iso, Ángeles Vázquez puxo en valor que as empresas públicas de xestión de residuos da cornixa cantábrica son como unha cadea na que cada comunidade é un elo e, ao igual que comparten o espírito do Camiño de Santiago, tamén poden e deben compartir o camiño da sostibilidade. O seu labor, concluíu, é vital para coidar esa faixa verde privilexiada que conforman os catro territorios bañados polo mar Cantábrico.

O encontro incluíu distintos talleres e presentacións durante a xornada de onte e no día de hoxe os representantes das empresas públicas de Asturias, Cantabria e Euskadi coñecerán as instalacións do complexo ambiental de Sogama e como desenvolve a súa actividade co fin de darlle valor á maior parte dos residuos que recibe e reducir ao mínimo os materiais desbotados que teñen que ir a incineración.

Fonte e imaxe: Consellería de Medio Ambiente e Cambio Climático