• Nun momento no que moitos países tratan de avanzar cara a unha bioeconomía sostible, os produtos forestais ofrecen solucións baseadas na natureza como substitutos de materiais intensivos en carbono, á vez que xeran novas oportunidades económicas 

Cerceda, 18 de marzo de 2026.-Este ano, o Día Internacional dos Bosques, que se celebrará o próximo 21 de marzo, pon o foco na súa achega á economía, enxalzando desta forma o papel esencial dos bosques como motor da prosperidade económica. Con todo, o seu papel vai moito máis aló dos ingresos e os postos de traballo derivados da produción forestal e o comercio de materias primas renovables e alimentos, xa que tamén sosteñen a agricultura familiar e comunitaria, melloran a produtividade agrícola e salvagardan a saúde das concas hidrográficas.

Nun momento no que moitos países tratan de avanzar cara a unha bioeconomía sostible, os produtos forestais ofrecen solucións baseadas na natureza como substitutos de materiais intensivos en carbono, á vez que xeran novas oportunidades económicas.  

Coa conmemoración desta efeméride chámase á acción para aproveitar as innovacións tecnolóxicas en favor dos nosos bosques, facendo fronte á crecente ameaza da deforestación, a degradación do hábitat e o cambio climático.

Entre as mensaxes crave da campaña deste ano, cabería destacar que a natureza, especialmente os bosques, xera preto de 44 billóns de dólares (máis da metade do PIB mundial) e protexe ás economías fronte a desastres climáticos. A bioeconomía emerxente céntrase nos bosques, xa que produtos como a madeira e o bambú poden substituír materiais con alta pegada de carbono (aceiro, plástico), promovendo economías máis sostibles. Ademais, os bosques son esenciais para a economía de moitas comunidades rurais, ao proporcionar alimentos, medicinas, combustible, ingresos e beneficios como auga limpa e estabilidade do solo.

Beneficios

A Organización das Nacións Unidas para a Alimentación e a Agricultura (FAO) estima que os bosques cobren un terzo da terra e son un dos grandes provedores da natureza que cumpren funcións esenciais para a preservación do planeta e a vida:

• Frean o cambio climático: as árbores almacenan carbono, o que axuda a mitigar os impactos do cambio climático. Estímase que os bosques de todo o mundo conteñen 662.000 millóns de toneladas de carbono, o que constitúe máis da metade das reservas de carbono mundiais que se atopan nos solos e a vexetación. Ademais, son un acondicionador natural do aire, baixan a súa temperatura entre 2 e 8 graos.
• Forman unha barreira contra o ruído: as grandes masas forestais amortecen as ondas sonoras do ruído das estradas, as industrias ou os núcleos urbanos.
• Son unha fonte de auga: encárganse de proporcionar o 85% da auga doce das principais cidades do mundo.
• Proporcionan enerxía: os dendrocombustibles representan unha fonte de enerxía potencialmente renovable e neutra con respecto ás emisións de carbono. A FAO estima que aproximadamente 2.600 millóns de persoas dependen da madeira e outros combustibles tradicionais para cociñar nos seus fogares.
• Son o fogar de moitas especies: desempeñan unha función crave para conservar a vida do planeta e son os ecosistemas terrestres de maior biodiversidade, xa que albergan o 80% das especies animais e vexetais.
• Preservan a nosa supervivencia: máis de 5.000 millóns de persoas recorren aos produtos forestais non maderaibles para o seu propio uso ou como axuda para a súa subsistencia, coa particularidade de que as masas forestais posibilitan e contribúen a mellorar a saúde mental e previr enfermidades.
• Fortalecen a resiliencia ambiental: se están xestionados de maneira sostible, contribúen a reducir a erosión do solo e o risco de avalanchas, esvaramentos de terra e desastres naturais.

Fonte: FAO