• O obxectivo é recompilar información inicial sobre a xestión dos residuos en cada colexio e entrevistar os docentes coordinadores para coñecer con máis detalle os proxectos, obxectivos establecidos e actividades a realizar durante os próximos meses
• Así mesmo, faráselles entrega dos medios materiais: illas de reciclaxe, conformadas cada unha por catro contedores de recollida selectiva, e composteiros, que serán subministrados a aquelas escolas que xeren materia orgánica e que dispoñan de terreo no que aplicar o compost resultante

Cerceda, 9 de decembro de 2025.- Hoxe comeza a primeira visita de diagnóstico aos 25 centros de infantil, primaria e educación especial que este curso académico 2025-2026 participan no programa “Recíclate con Sogama”, canalizado a través do Plan Proxecta da Xunta de Galicia.

Educadores desta empresa pública desprazaranse fisicamente aos colexios para realizar un primeiro diagnóstico da xestión dos residuos nos mesmos e entrevistar aos coordinadores do programa a fin de coñecer con máis detalle os proxectos, obxectivos e actividades a realizar durante os próximos meses.

Así mesmo, e tras remitir os recursos didácticos elaborados por Sogama, procederase a entregar os medios materiais. É o caso das illas de reciclaxe, conformadas cada unha por catro contedores con capacidade para 120 litros (amarelo, azul, marrón e xenérico) e composteiros para aquelas escolas nas que se xere materia orgánica e dispoñan de terreo (hortoa e/ou xardín) para a aplicación do compost resultante.

O próximo mes de xaneiro, e logo das vacacións de Nadal, levaranse a cabo, nos propios centros, sesións formativas presenciais nas que se explicará ao alumnado a problemática, tanto ambiental como económica e social, inherente á elevada produción de lixo, froito dun modo de vida asociado ás malas prácticas de usar e tirar, e a necesidade de instaurar unha xestión sostible dos residuos que dea comezo coa prevención e a redución da súa xeración, continúe coa reutilización dos produtos e culmine coa separación dos residuos en orixe e o seu posterior depósito nos correspondentes contedores de recollida selectiva, garantindo deste xeito a súa reciclaxe e, polo tanto, a súa transformación en novas materias primas.

En torno ao mes de marzo efectuarase unha visita de seguimento para avaliar a marcha dos proxectos e resolver posibles dúbidas e, xa a final de curso, a última visita incluirá unha caracterización dos contedores para comprobar o grao de acerto ou erro na selección de refugallos.

Centros participantes 2025-2026

Provincia de Pontevedra (9)

• CEIP de Lourido, de Poio
• CEIP Plurilingüe Nosa Señora da Piedade, de Vila de Cruces
• CPR Santa María e CRA Mestra Clara Torres, de Tui
• CEIP Plurilingüe San Benito de Lérez, de Pontevedra
• CPR Plurilingüe Lar e CEIP de Atín-Cela, de Mos
• CEIP Plurilingüe de Tirán, de Moaña
• CPR Plurilingüe Marquesa do Pazo da Mercé, das Neves

Provincia da Coruña (9)

• CPI Armando Cotarelo Valledor, de Boimorto
• CEE A Barcia, CEE Manuel López Navalón e CEIP Arquitecto Casas Novoa, de Santiago de Compostela
• CEIP Plurilingüe Alborada e CEIP Plurilingüe Labaca, de A Coruña
• CRA de Bergondo, Bergondo
• CPI Alcalde Xosé PicheL, de Coristanco
• CEIP Plurilingüe A Magdalena, das Pontes

Provincia de Lugo (1)

• CEIP Plurilingüe Lagostelle, de Guitiriz

Provincia de Ourense (6)

• CPR Plurilingüe Luis Vives e CEIP Manuel Luis Acuña, de Ourense
• CPI Terras de Maside, de Maside
• CPR Plurilingüe María Inmaculada, de Verín
• CEIP de Casaio, de Carballeda de Valdeorras
• CPR Plurilingüe Divina Pastora, de O Barco de Valdeorras

Saúdos, Departamento de Comunicación