• O intenso e continuo bombardeo de ofertas e descontos propios deste evento, xera novas necesidades que desembocan en compras masivas de produtos que, na súa meirande parte, non precisamos e que, máis cedo que tarde, acabarán convertidos en refugallos

• Comparar prezos, preparar unha lista do que se necesita, establecer un orzamento, optar por produtos duradeiros e reparables, ou consumir no comercio local son, entre outros algúns dos consellos a poñer en práctica

Cerceda, 26 de novembro de 2025.-O Black Friday, non só se converteu nun dos eventos comerciais máis importantes do ano, senón tamén nunha fonte significativa de impactos ambientais, especialmente no incremento de residuos e emisións de CO2 procedentes do transporte.

O intenso e continuo bombardeo de ofertas e descontos xera novas necesidades que desembocan en compras masivas de produtos que, na súa meirande parte, non precisamos e que, máis cedo que tarde, acabarán convertidos en refugallos.

É por isto que, antes de lanzarnos a consumir, convén ter en conta unhas sinxelas recomendacións:

• Compara prezos para evitar falsas ofertas.
• Prepara unha lista co que realmente necesites.
• Establece un orzamento e evita compras impulsivas.
• Prioriza a adquisición de produtos duradeiros e reparables.
• Dá preferencia aos produtos coa menor embalaxe posible e que, en todo caso, esta sexa reciclable ou compostable.
• Avalía se podes reparar antes de substituír.
• Opta por artigos con certificacións ambientais ou comercio xusto.
• Compra no comercio local. Ademais de que contribuirás a xerar un impacto económico positivo na comunidade, tamén estarás a colaborar na redución das emisións de CO2 e, por tanto, da pegada do transporte.
• No caso do consumo en liña, agrupa pedidos e evita devolucións innecesarias, xa que incrementan as emisións.

Reducir o impacto ambiental do Black Friday é posible se se adoptan prácticas responsables. O obxectivo non é eliminar o consumo, senón facelo de forma consciente, eficiente e sostible.

Reflexionar antes de comprar

Así que, antes de consumir, pregúntate:

• Necesítoo realmente?
• Podo reparalo ou compralo de segunda man?
• Hai unha opción local ou sostible?
• Podo agrupar envíos ou evitar devolucións?

O verdadeiro aforro non reside en aproveitar descontos, senón en gastar o menos posible para satisfacer as nosas necesidades reais.

Saúdos, Departamento de Comunicación