• Así se puxo de relevo durante a novena edición da campaña “1 m2 polas praias e os mares”, que mobilizou a 5.890 persoas en toda España, encargándose de retirar e caracterizar máis de 28 toneladas de refugallos

Cerceda, 7 de outubro de 2025.- No marco do Día Internacional de Limpeza de Praias (World Clean Up Day), o Proxecto LIBERA celebrou unha nova edición da súa campaña ‘1m2 polas praias e os mares’, procedendo á retirada e caracterización de máis de 28 toneladas de residuos para coñecer a súa orixe.

Esta acción colectiva nas costas españolas mobilizou a 5.890 persoas, que se sumaron a esta cita para levar a cabo tarefas de limpeza e contribuír á análise do impacto dos residuos nos ecosistemas mariños. 

Grazas á implicación da cidadanía, nesta novena edición puidéronse recoller máis de 151.000 residuos en 339 puntos distribuídos por todo o país. O obxectivo é obter datos precisos sobre a cantidade e tipoloxía dos mesmos, xerando coñecemento para promover solucións efectivas fronte a este problema ambiental. Os elementos máis atopados foron pezas de plástico, cabichas e botellas de bebida.

Ademais, como en anos anteriores, a convocatoria contou cunha ampla participación de diversos colectivos tales como administracións locais, centros educativos, empresas e asociacións, que organizaron 274 puntos de mostraxe.  A Rede de Vixiantes Mariños, iniciativa da ONG Oceánidas, retirou máis de 6500 kg de residuos mariños en puntos crave como Melilla, Alacante, Bizkaia, Conca e Menorca, grazas á implicación de clubs de mergullo locais e máis de 2.000 voluntarios.

No proceso de caracterización de residuos, os colectivos fixeron uso da app MARNOBA. Toda a información obtida intégrase directamente na base de datos do MITECO e queda reflectida no ‘Barómetro da Basuraleza’ do Proxecto LIBERA.

Fonte e imaxe: SEO/BirdLife