• No mesmo establecen catro prioridades políticas para garantir o futuro dunha das cadeas de valor da economía circular máis consolidadas da UE
• O sector lembra que a reciclaxe de papel é unha historia de éxito: cada tonelada de papel recuperado aforra recursos, reduce emisións de CO₂ e sostén miles de empregos

Cerceda, 11 de novembro de 2025.-A división de papel de Recycling Europe (Recycling Europe Paper), que representa aos recolledores e recicladores de papel recuperado, presentou o seu “Manifesto dos recicladores da UE: eliminar as barreiras á circularidade do papel”, no que establecen catro prioridades políticas para garantir o futuro dunha das cadeas de valor de economía circular máis consolidadas da Unión Europea.

O sector lembra que a reciclaxe de papel é unha historia de éxito: cada tonelada de papel recuperado aforra recursos, reduce emisións de CO₂ e sostén miles de postos de traballo. Con todo, advirte de que este logro está cada vez máis ameazado pola fragmentación normativa, as presións do mercado e o crecente risco de incendios provocados por baterías de litio mal separadas nos fluxos de residuos. Sen unha acción coherente a escala comunitaria, Europa corre o risco de perder impulso en circularidade e competitividade.

O manifesto insta aos responsables políticos da UE a:

• Recoñecer o papel recuperado como recurso, co fin de achegar seguridade xurídica e apoiar novos investimentos.
• Reducir as cargas administrativas e reforzar o mercado único de materiais reciclados, eliminando barreiras que dificultan a libre circulación do papel recuperado entre Estados membros.
• Manter o acceso aos mercados globais para equilibrar a oferta e a demanda, garantindo a estabilidade económica do sector.
• Abordar o risco de incendios por baterías de litio mediante un mellor deseño, unha eliminación adecuada e unha aplicación máis estrita da normativa.

O sector insiste en que Europa ten a oportunidade de reforzar unha cadea de valor circular que xa achega beneficios climáticos, resiliencia industrial e oportunidades económicas.

Fonte e imaxe: Recycling Europe