• Ponse así en valor a decidida contribución desta compañía pública á economía circular como modelo de desenvolvemento, incorporándoa a todos os seus ámbitos de xestión

• Este recoñecemento súmase a outros anteriores obtidos en 2017, 2019, 2020 e 2021, resultado da análise que cada ano efectúa o Departamento de Estudos Económicos do Consorcio da Zona Franca de Vigo, baixo o amparo da Cátedra ARDÁN da Universidade de Vigo, sobre máis de 45.000 empresas galegas

Cerceda, 14 de novembro de 2025.- Sogama obtivo este ano o indicador ARDÁN de Empresa Circular 2025, dada a súa decidida contribución á economía circular como modelo de desenvolvemento, que incorpora a todos os ámbitos da súa xestión.

Trátase dun recoñecemento que se suma a outros anteriores, resultado da análise que cada ano realiza o Departamento de Estudos Económicos do Consorcio da Zona Franca de Vigo, baixo o amparo da Cátedra ARDÁN da Universidade de Vigo, sobre máis de 45.000 empresas galegas.

Cómpre lembrar que esta compañía pública recibiu nos últimos tempos diversos Indicadores ARDÁN, entre eles o de Empresa de Alta Produtividade 2017, título que renovou en 2020. Tamén o de Empresa Innovadora 2019, que replicou en 2020; o de Empresa Xeradora de Riqueza 2019; o de Empresa Circular 2020, que repetiu por duplicado  en 2021 e 2025; e o de Empresa de Igualdade de Xénero en 2021.

A estas distincións súmanse outras tales como Premio Cantábrico Excelente 2015, Premio de Xestión Ambiental El Suplemento 2017 e Premio European Business Awards, en 2021.

De xestionar residuos a xerar recursos

Máis aló de ser unha empresa de xestión e tratamento de residuos, Sogama, no marco do seu novo Plan Estratéxico 2025-2030, aspira  a ser unha entidade xeradora de recursos, de aí que na súa folla de roteiro figuren proxectos tales como a posta en marcha, a mediados de 2026, dunha planta de clasificación de residuos téxtiles, a primeira de carácter público en España, e que xa está en construción.

Tamén se está a implicar na transformación dixital, incorporando á súa industria a robotización e a intelixencia artificial  para gañar en eficiencia e contribuír en maior medida á reciclaxe, á vez que levará a cabo un seguimento da rastrexabilidade do residuo desde que entra nas súas instalacións ata que sae das mesmas convertida en recurso.

A descarbonización dos procesos é outra das súas prioridades, substituíndo un combustible fósil, como é o gas natural, que utiliza na súa planta de coxeración para o secado da fracción húmida contida nos refugallos, por un biosecado renovable.

O obxectivo de Sogama non é só ser unha empresa circular, senón tamén divulgar as bondades da economía circular a través da educación ambiental e as súas accións no ámbito da concienciación e sensibilización dos distintos colectivos sociais.

Saúdos, Departamento de Comunicación