• Marca así un fito na loita contra a contaminación mariña e o primeiro intento formal de establecer límites cuantificables a estes residuos
• Os limiares establecidos supoñen un paso esencial para reducir a contaminación mariña, ao traducir en obxectivos concretos a necesidade de controlar a acumulación de refugallos e orientar as medidas de xestión dos Estados membros
• Para cumprir os novos limiares, os Estados membros quedan obrigados a incorporar medidas adecuadas nas súas estratexias mariñas

Cerceda, 10 de decembro de 2025.- O lixo mariño, e en particular a contaminación por plásticos, constitúe un dos problemas ambientais máis graves que enfrontan os océanos do mundo, xa que ameaza á fauna mariña, prexudica ao turismo costeiro, dana a pesca e a acuicultura, e xera riscos, tanto para a saúde como para o benestar humano.

Tomando como referencia este escenario, os Estados membros acordaron novos limiares para o lixo no fondo mariño, marcando un fito na loita contra a contaminación mariña e o primeiro intento formal de establecer límites cuantificables a estes refugallos.

Sábese que gran parte dos residuos que aparecen nas praias ou flotan na superficie rematan no fondo do mar. Ata o de agora, a maioría da información dispoñible sobre o lixo no fondo mariño procedía dos refugallos recollidos de forma accidental nas redes durante a pesca de arrastre de fondo. Con todo, as artes de arrastre difiren significativamente entre as distintas rexións europeas, o que facía que estes datos fosen pouco fiables e difíciles de comparar. Ademais, existen numerosas zonas que non poden monitorizarse deste xeito, o que converte en imprescindibles os novos métodos de seguimento visuais e baseados en imaxes.

En virtude do acordo alcanzado, as zonas nas que se cuantifican os residuos do fondo mariño mediante estudos de arrastre, non poderán rexistrar un aumento da cantidade de refugallos co paso do tempo. Naquelas áreas onde o seguimento se realiza de forma visual, non se permitirá a presenza de máis dun residuo por cada 1.000 metros cadrados. As avaliacións actuais focalízanse en augas de ata 200 metros de profundidade, definindo así o ámbito técnico inicial de aplicación.

Estes limiares supoñen un paso esencial para a redución da contaminación mariña, ao traducir en obxectivos concretos a necesidade de controlar a acumulación de residuos e orientar as medidas de xestión dos Estados membros. Para cumprir os novos limiares, os Estados membros quedan obrigados a incorporar medidas adecuadas nas súas estratexias mariñas, tal como esixe o Directiva Marco sobre a Estratexia Mariña (DMEM).

Desenvolvemento técnico futuro e ampliación da vixilancia

Prevese que o traballo técnico continúe nos próximos anos, coa posibilidade de definir límites adicionais para aqueles tipos de lixo considerados máis daniños, reforzando así a protección fronte aos residuos de maior impacto ecolóxico.

Así mesmo, contémplase a ampliación da vixilancia a augas máis profundas, estendendo progresivamente o alcance xeográfico e ecolóxico da avaliación de residuos no fondo mariño.

Os valores limiar agora acordados foron elaborados polo Grupo Técnico sobre Lixo Mariño no marco do Directiva Marco Estratéxico da Mariña (DMEM) e recibiron a aprobación dos directores mariños da UE.

Esta iniciativa enmárcase no apoio ao “Plan de Acción de Contaminación Cero” e dá continuidade á decisión previa da UE de fixar un límite para o lixo costeiro, que establece que non se permitan máis de 20 artigos de lixo por cada 100 metros de costa.

Fonte: Comisión Europea

Imaxe: Freepik